Ditën e sotme është shkarkuar nga detyra e drejtorit të Përgjithshëm të Parandalimit dhe Pastrimit të Parave, Elvis Koçi. Ai është është larguar nga detyra për arsye që ende nuk janë bërë të ditura zyrtarisht.
Vendimi është marrë sot në mbledhjen e Këshillit të Ministrave, dhe në vendin e tij mësohet se është emëruar, Iris Ago. Vendimi ka hyrë në fuqi menjëherë pas botimit në fletoren zyrtare.
“Në mbështetje të nenit 100 të Kushtetutës dhe të pikës 3, të nenit 21, të ligjit nr.9917, datë 19.5.2008, “Për parandalimin e pastrimit të parave dhe financimit të terrorizmit”, të ndryshuar, me propozimin e ministrit të Financave dhe Ekonomisë, Këshilli i Ministrave. Vendosi: 1. Z. Elvis Koçi, drejtor i Përgjithshëm i Drejtorisë së Përgjithshme të Parandalimit të Pastrimit të Parave, lirohet nga kjo detyrë. 2. Znj. Iris Ago emërohet drejtor i Përgjithshëm i Drejtorisë së Përgjithshme të Parandalimit të Pastrimit të Parave. Ky vendim hyn në fuqi menjëherë dhe botohet në “Fletoren zyrtare””, thuhet në VKM.
Drejtoresha e emëruar Iris Ago ka mbaruar studimet e larta për Financë-Kontabilitet. Ajo rezulton të ketë mbajtur një sërë postesh drejtuese në administratën shtetërore ndër të cilat ka mbajtur pozicionin Këshilltar në Ministrinë e Financave dhe Ekonomisë, më herët Drejtoreshë në Drejtorinë e Tatimpaguesve të Mëdhenj nga viti 2020 deri në vitin 2021.
Ndërkohë që gjatë periudhës 2017 – 2020 ka drejtuar Drejtorinë e Kontrollit Tatimor, pranë Drejtorisë së Përgjithshme të Tatimeve dhe në vitet 2016 – 2017 ka mbajtur detyrën e Këshilltarit pranë Drejtorit të Përgjithshëm të Tatimeve.
Iris Ago ka lindur në Tiranë 1987. Ka përfunduar studimet e larta në Fakultetin e Ekonomisë, Universiteti i Tiranës, dega Financë-Kontabilitet gjatë periudhës 2005-2009, më tej ka vazhduar studimet Master Shkencor VITET, pranë Universitetit Europian të Tiranës, si dhe zotëron titullin MSc Bankë dhe Sigurime.
Ago ka një karrierë të gjatë në fushën e financave. Ajo ka ushtruar profesionin e saj si konsulente financiare, koordinatore dhe në menaxhimin e projekteve të ndryshme në sektorin privat prej vitit 2009 deri në 2016-ën. Gjithashtu ka përvojë dhe ekspertizë të thelluar në fushën e konsulencës financiare; tatimore dhe kontabilitetit për kompanitë të sektorëve të ndryshëm; këshillim për fondet e investimeve; planifikim marketingu; studime fizibilitetiti; studim tregu; plan biznesi; konsultim për marrëdhëniet e shoqërisë me institucionet financiare për kreditim ose financim; konsultim për marrëdhëniet e kompanisë me sektorin publik. Pjesë e rëndësishme e detyrave gjatë përvojës në sektorin privat ka qenë dhe angazhimi në disa projektë strategjike, si ai i gazsjellësit TAP.
Është trajnuar mbi Standardet Kombëtare dhe Ndërkombëtare të Kontabilitetit (SKK & IFRS), Sfidat e Lidershipit në Shqipëri organizuar nga Universiteti George ëashington, si dhe ka kontribuar në programin e “Doing Business” për vite me radhë. Ajo zotëron gjuhët anglisht dhe italisht.
Kujtojmw se sot u sekuestruan 2 milion euro nw pasuri një 39-vjeçari në Tiranë.
