Një ngjarje e rëndë ka ndodhur në mes të Prishtinës ditën e sotme ku një shtetas turk është ekzekutuar me armë zjarri. Sipas detajeve të dhëna nga Policia e Kosovës, është njoftuar se shtetasi turk është vrarë nga një turk tjetër dhe se ngjarja ka ndodhur në lagjen Dardania.
Referuar njoftimit të policisë, i dyshuari dhe viktima (të dy shtetas turq), kanë qenë brenda të njëjtës makinë.
Autori ka qenë i ulur në sediljen e pasme të mjetit, ka qëlluar me armë zjarri drejt viktimës dhe për pasojë, ky i fundit ka humbur jetën.
Policia ka arritur të identifikojë autorin dhe është futur në banesën e tij. Efektivët e kanë bastisur godinën e kanë arritur që të mësojnë emrin dhe të gjejnë një foto të autorit të ngjarjes. Arma e krimit është gjetur rreth 100-150 metra larg vendit të krimit, në një kosh plehrash.
Atila Yildirim është personi kryesor i dyshuar për vrasjen e bashkëatdhetarit të tij, ditën e sotme në Prishtinë. Ai është shpallur në kërkim nga policia e Kosovës pasditen e sotme pas identifikimit të tij nga forcat e armatosura.
Lajmin e ka bërë të ditur vetë policia e Kosovës me anë të një njoftimi që ka bërë në faqen zyrtare. Në njoftim policia ka treguar emrin dhe foton e personit të dyshuar për vrasjen që ndodhi në rrugën “Bekim Fehmiu”. Më tej, policia ka falenderuar qytetarët për bashkëpunimin dhe ndihmën që kanë dhënë.
Njoftimi i Policisë:
Referuar rastit të vrasjes që ka ndodhur sot rreth orës 12:00 ne rrugën “Bekim Fehmiu” në Prishtinë. Drejtoria Rajonale e Policisë – Prishtinë, pas identifikimit të personit të dyshuar me autorizim të Prokurorisë së shtetit, shpallë në kërkim personin e dyshuar; YILDIRIM ATILA (1967), shtetas i Turqisë.
Duke i falënderuar qytetarët për bashkëpunimin e vazhdueshëm, në veçanti për këtë rast, po ju përcjellim fotografinë e pesonit të dyshuar dhe kërkojmë nga të gjithë ata që kanë informacione lidhur me vendndodhjen e personit të kërkuar ta njoftojnë policinë në numrin 192./Gazetareforma.com/
