Policia e Shtetit ka njoftuar se pasditen e sotme do të finalizojë ekstradimin nga Emiratet e Bashkuara Arabe të shtetasit shqiptar Florenc Çapja, 44 vjeç, një ndër personat më të kërkuar nga drejtësia shqiptare në nivel ndërkombëtar.
Sipas burimeve zyrtare, Çapja pritet të mbërrijë në aeroportin e Rinasit rreth orës 16:00. Operacioni i ekstradimit është realizuar falë bashkëpunimit mes strukturave të specializuara të Policisë së Shtetit dhe agjencive partnere ligjzbatuese jashtë vendit, nëpërmjet shkëmbimit të informacionit operativ.
Florenc Çapja ishte i arratisur prej kohësh në Dubai dhe kërkohej për një sërë veprash të rënda penale, përfshirë porositjen e vrasjeve dhe pjesëmarrjen në veprimtari kriminale me shtrirje ndërkombëtare.
Ndaj tij rëndon akuza për vrasjen e babë e bir, Nezir dhe Gentian Beqiri, ngjarje e ndodhur në vitin 2012 në Elbasan. Sipas hetimeve të SPAK, Çapja dyshohet si porositësi i këtij krimi të dyfishtë, i cili ka qenë pjesë e një zinxhiri ngjarjesh kriminale që lidhen me përplasjet mes grupeve rivale.
Njoftimi i policisë:
Policia e Shtetit, në vijim të bashkëpunimit mjaft të mirë me partnerët, si në aspekte hetimore, ashtu dhe në ato operacionale, dhe si rezultat i shkëmbimit të menjëhershëm të informacionit mes strukturave të specializuara për lokalizimim dhe kapjen e shtetasve në kërkim ndërkombëtar, me qëllim ekstradimin, pasditen e sotme, do të finalizojë me sukses një tjetër fazë të operacionit ndërkombëtar të koduar “The Wanted”.
Në kuadër të këtij operacioni, pritet që pasditen e sotme, të finalizohet me sukses ekstradimi nga Dubai, i të shumëkërkuarit Florenc Çapja, 44 vjeç, banues në Elbasan.
Për informacion më të detajuar, do të japim njoftim në momentin e finalizimit të operacionit të ekstradimit në Rinas.
