Eksportet shqiptare po bien në mënyrë të vazhdueshme dhe në janar kanë zbritur në nivelin e vitit të pandemisë, kur fabrikat ishin të mbyllura. Për të pestin vit radhazi, shitjet jashtë vendit po tkurren, duke dhënë një sinjal të fortë alarmi për ekonominë.
Të dhënat zyrtare të Instituti i Statistikave tregojnë se në janar 2026 eksportet arritën në 26.7 miliardë lekë, ose rreth 277 milionë euro. Një vit më parë ishin 31 miliardë lekë. Pra, brenda një viti janë zhdukur mbi 4 miliardë lekë eksporte. Ky është janari më i dobët që nga viti 2021, kur vendi ishte në izolim nga pandemia.
Arsyeja kryesore është forcimi i lekut ndaj euros. Kur leku forcohet, produktet shqiptare bëhen më të shtrenjta për të huajt. Kjo do të thotë më pak porosi, më pak kontrata dhe më pak para që hyjnë në vend. Prodhuesit përballen me një zgjedhje të vështirë: ose të ulin çmimet dhe të punojnë me humbje, ose të mbyllin aktivitetin.
Goditjen më të madhe e kanë marrë industria përpunuese, sidomos fasonët, por edhe sektori nxjerrës. Sipas INSTAT, “Gjatë muajit Janar 2026, në uljen e eksporteve prej 4,5 %, negativisht kanë ndikuar grupet: “Minerale, lëndë djegëse, energji elektrike” me -2,9 pikë përqindje , “Tekstile dhe këpucë” me -1,8 pikë përqindje, “Produkte kimike dhe plastike” me -0,4 pikë përqindje, etj,” tha INSTAT.
Me pak fjalë, eksportet po bien në pikën ku ishin kur ekonomia ishte e mbyllur. Ndryshimi është se këtë herë fabrikat nuk janë në lockdown, por po përballen me një treg që po u mbyllet për shkak të humbjes së konkurrueshmërisë.
