Pedagogu i një shkolle private në kryeqytet, Viron Bezhani, do të kandidojë këtë fushatë në logon e partisë LSI. Bezhani është një figurë e njohur e sportit dhe ka qenë edhe president i KOKSH-it në Shqipëri. Tashmë, Bezhani i është futur politikës dhe duket se kërkon me çdo kusht të fitojë, madje dhe duke shkelur ligjin.
Pedagogu ka marrë numrat e telefonave të studentëve të shkollës private, që i kanë dorëzuar në sekretari për marrë informacione në lidhje me datat dhe oraret e mësimeve e provimeve. Por këta numra telefoni, Bezhani i ka marrë dhe i ka përdorur për fushatë.
Pasi ka krijuar një grup në “WhatsApp” ku ka futur më shumë se 160 studentë, ka mbërritur një mesazh ku mes të tjerave shkruhej: “Vota jonë, është detyrë morale për Viron Bezhanin”. Studentët kanë dorëzuar të dhënat e tyre në sekretari për qëllime të tjera dhe kanë marrë garancinë se të dhënat do të jenë private, por mesa duket, studentët janë gënjyer. Duket se skandalet në Shqipëri, janë të çdo lloji dhe nuk kanë të mbaruar…
Mesazhi dërguar studentëve të shkollës private:
“Përshëndetje! Faleminderit paraprakisht për mirëkuptimin e mesazhit qe ju dërgojmë. “Mjeshtri i Madh i Sportit” Viron Bezhani, ish-Kampion ne Mundje dhe një figurë elite në sportin shqiptar dhe në administrim në institucione, biznes por edhe ne sport, duke arritur deri edhe ne pozitat drejtuese si kreu i Lëvizjes Olimpike në Shqipëri, është kandidat për deputet i Qarkut Tirane ne zgjedhje.
Një personalitet në shumë plane, si sportist, kampion, si zyrtar, drejtues federate, organizator i ngjarjeve Europiane e Botërore të Mundjes në Shqipëri, anëtar i Këshillit Bashkiak Tiranë, nën-kryetar i LSI-së për Tiranën dhe Sekretar i LSI-së për Sportin, ku ne propozimet zgjedhore të LSI-së për zgjedhjet e 2021-2025 ka propozuar pesë prioritetet për Sportin të cilat tregojnë vëmendjen e munguar të qeverisjes aktuale edhe për sportin, e bëjnë Viron Bezhanin Ambasadorin e njerëzve të sportit në politike.
Me një prejardhje familjare të nderuar dhe si një njeri i fjalës e shpirt kampioni e “Fair Play”, ai do te konkurrojë në zgjedhje me numrin 17 për LSI.
Ju ftoj ta mbështesim dhe jeni të mirëpritur për të na kontaktuar për çdo angazhim, pyetje a koment. Vota jonë, është detyrë morale për Viron Bezhanin. Me respekt, Oltjan Bardhi”, shkruhej në mesazhin dërguar studentëve.
