Kandidatja për kryetare të Partisë Demokratike, Edith Harxhi ka reaguar pas mbledhjes së sotme të Kryesisë. Në një postim në rrjetet sociale, Harxhi shkruan se është një akt i rëndë për një parti të djathë përjashtimi nga gara i kandidatëve. Ajo e quajti Lulzim Bashën besëprerë, ndërsa përjashtimin e Ibsen Elezit e quajti të pajustifikueshëm. Harxhi shprehet se Elezi kërkon reformimin e Partisë Demokratike prej vitesh nga marrja peng nga një njeri i vetëm.
Postimi i plotë:
Përjashtimi nga gara i kandidatëve për Kryetar Partie është akt i rëndë për një Parti të djathtë për të cilën Kryetari i saj aktual ka premtuar disa herë sistem përballje (primaresh), por edhe në këtë rast si në raste të tjera ishte besëprerë.
Në veçanti përjashtimi nga gara i Ibsen Elezit njërit prej kandidatëve të Grupit për PD-në, si një nga zërat opozitarë më të paepur në Shqipëri, ish Kryetar i Partisë Demokratike të Kuksit dhe ish-Kryetar i Qarkut të Kuksit, ish-anëtar i Këshillit Kombëtar, është i pajustifikueshëm dhe i rëndë.
Elezi prej disa vitesh kërkon reformimin e thellë të Partisë nga marrja peng e saj nga një njeri i vetëm. Ne do ta vazhdojmë së bashku si grup këtë betejë për reformim pavarësisht pengesave të qëllimshme nga Kryetari aktual.
