Vëllai i kryebashkiakut të arrestuar të Tiranës, Arbi Veliaj, është paraqitur sërish sot në SPAK. Ai qëndroi për rreth 30 minuta në ambientet e Prokurorisë, por këtë herë nuk pranoi të flasë për mediat. Një ditë më parë kishte deklaruar “erdha vullnetarisht për të shprehur bashkëpunimin tim me institucionin”, duke imituar të njëjtën gjuhë që përdorte edhe i vëllai, Erion Veliaj, kur shfaqej “për t’u takuar me kolegët”.
Por ndryshe nga çfarë përpiqet të paraqesë Arbi, ai nuk është thjesht “person në dijeni” e duket se orët e lirisë po përfundojnë edhe për të. Në dosjet e SPAK emri i tij del si përfitues i drejtpërdrejtë i aferave të Veliajve: në kontrata me kompani ndërtimi, në transferta të dyshimta financiare, në blerje pasurish me çmime qesharake dhe në lëvizje të pasurive brenda familjes.
Shembulli më flagrant është porositja e një njësie 451.9 m² në kompleksin “Rainbow” pranë qendrës së Tiranës, me vlerë 813,420 euro, shumë më pak se çmimi real i tregut. Fillimisht kontrata ishte nën emrin e Gogel Shp, kompania e Arbi Veliajt, por më 3 tetor 2023 ajo iu transferua Gogel Holdings Shpk, e përfaqësuar nga bashkëshortja e tij, Ana Xhoxhaj, duke i kaluar kështu pronësinë brenda familjes. Në momentin e transferimit mbeteshin ende të papaguara mbi 133 mijë euro. Një manovër e qartë për të pastruar dhe fshehur pasuri.
Po aq e rëndë është lidhja mes Gogel Shpk dhe AVA Studio, një kompani fantazmë në pronësi të Valbona Xoxës, nënës së Ajola Xoxës (bashkëshortes së Erionit). Dokumentet tregojnë transferta prej mbi 7.4 milionë lekësh nga Gogel drejt AVA Studio, ndërsa në terren rezultoi se kjo kompani nuk ka as zyra, as pajisje, as punonjës. Megjithatë, ka lëshuar fatura deri në 36 mijë euro për “shërbime sipas kontratës”, një maskë banale për pastrim parash.
Ndërkohë që Erion Veliaj është pas hekurave, Arbi është ai që sot mban në këmbë perandorinë. Ai financon avokatët, kontrollon lidhjet me biznesmenët që janë nën hetim, si Fatmir Bektashi, Shkëlqim Fusha, Gentian Sula, Sokol Kryeziu e Meriman Palushi, të gjithë të lirë me “detyrim paraqitje” dhe nuk ka hezituar të përdorë paratë e mbetura të padeklaruara për të blerë edhe media, duke ruajtur imazhin e vëllait dhe duke ushqyer propagandën e tij.
Nëse pasuritë ende të pa sekuestruara përdoren për të paguar avokatë dhe media, ky është një skandal politik dhe moral. Arbër Veliaj nuk është spektator. Ai është njeriu që financon dhe menaxhon nga jashtë, duke u përpjekur të mbajë gjallë pushtetin e të vëllait pas grilave. Mirëpo, njëri pas tjetrit, dy vëllezërit ranë në rrjetën e SPAK dhe presim së shpejti të mësojmë fatin e vëllait të vogël “vullnetar” që sot refuzoi të shpjegonte paraqitjen e tij në institucion.
