Edhe Kosova si Shqipëria, qeveria kthen bixhozin, kazinot dhe bastet sportive

Jo vetëm Shqipëria por tashmë edhe vëllezërit tanë kosovarë, kanë ndjekur shembullin tonë dhe janë gati të rihapin kazinotë dhe lojërat e fatit.

Qeveria e Republikës së Kosovës ka hartuar projektligjin për Lotarinë e Kosovës, që parashikon kthimin e lojërave të fatit në vend, të cilat ishin ndaluar në prill të vitit 2019.

Sipas këtij projektligji, qeveria planifikon që në kuadër të Lotarisë t’i kategorizojë disa veprimtari.

Ato që u mbyllen me shumë zhurmë gjatë vitit 2019, në kohën kur Ramush Haradinaj sa ishte bërë kryeministër, po tenton t’i kthejë me ligj kryeministri i tanishëm i Kosovës, Avdullah Hoti.

Qeveria e Kosovës, e udhëhequr nga Hoti, tashmë ka nisur procedurat ligjore që të rregullojë funksionimin e tyre përmes projektligjit për “Lotarinë e Kosovës”.

“Me këtë Ligj, rregullohet organizimi dhe funksionimi i Lotarisë së Republikës së Kosovës (këtu e tutje Lotaria), llojet e lojërave të fatit të organizuara nga Lotaria, kushtet dhe mënyra e organizimit të lojërave të fatit, rregullat e lojës, mbikëqyrja e tyre dhe mënyra e shpërndarjes së të ardhurave nga lojërat e fatit të lotarisë”,- thuhet në konsultimet për këtë ligj në faqen e qeverisë së Kosovës.

“Lojërat numerike, Lotaria instant/ekspres, prognozat sportive, bastet në numra apo ngjarje të tjera dhe Lojëra të tjera të ngjashme ku rezultatet bazohen në rastësi”,- do të jenë lojërat e fatit që pritet të organizohen nga ana e Lotarisë së Kosovës.

Projektligji i shkruar nga ana e Qeverisë ka 30 nene. Në prill të vitit të kaluar, qeveria e drejtuar nga kryeministri Ramush Haradinaj, kishte dërguar në kuvendin Ligjin për Ndalimin e Lojërave të Fatit.

Kuvendi i Kosovës kishte miratuar Ligjin, ku sipas të cilit mbyllen të gjitha lojërat e fatit në tërë Kosovën, përfshirë edhe lojërat të cilat organizohen nga Lotaria e Kosovës.

Ligji ka hyrë në fuqi më 10 maj 2019 dhe nga ajo datë janë pezulluar të gjitha lojërat e fatit të lotarisë deri në miratimin e ligjit të veçantë për Lotarinë e Kosovës.

Me projektligjin e ri shpjegohet se: “Lojërat e fatit – nënkupton lojën e organizuar nga Lotaria sipas dispozitave të këtij Ligji, në të cilën për pagesë të shumës së caktuar pjesëmarrësve u epet mundësia e fitimit në para, mallra ose të drejta, ku fitimi apo humbja varet nga rastësia ose nga ndonjë tjetër ngjarje e paparashikuar”.

Sipas të dhënave nga Dogana e Kosovës, akciza për aparatet e lojërave të fatit në Kosovë ka qenë e lartë dhe buxheti i shtetit brenda vitit ka inkasuar afër 20 milion euro nga kjo veprimtari. Ndërsa, 50 milionë euro llogaritet të jetë qarkullimi vjetor.

Që nga ajo ditë, lojërat e fatit në Kosovë ishin bërë ilegale dhe Policia e Kosovës kishte kryer arrestime të shumta për personat që kishin organizuar lojëra të fatit

Para pak javësh, një aksion i Policisë i zhvilluar në fshatin kufitar të Kamenicës, Karaçevë, asgjësoi disa objekte, në të cilën dyshohej se bëhej organizimi i lojërave të fatit.

/GazetaReforma.com/