Një ngjarje e rëndë tronditi qytetin e Laçit dy ditë më parë. Një 24-vjeçar mbeti i pajetë pasi u qëllua me armë nga një 32-vjeçar për një vend parkimi.
Lidhur me vrasjen e 24-vjeçarit Viktor Shkorreti, autori i ngjarjes Emanuel Koca ka deklaruar në polici se është penduar për krimin.
Koca është shprehur se gjithçka ka ndodhur në kushtet e vetëmbrojtjes. Sipas tij ka qenë viktima, ai i cili e kishte qëlluar fillimisht me thikë, ndaj në kushtet e vetëmbrojtjes ai ka marrë armën dhe e ka qëlluar, por tashmë ndihet i penduar.
“Jam penduar për atë që kam bërë, Viktor Shkorreti më qëlloi me thikë, ndaj e qëllova me armë”, është shprehur Koca në polici.
Ndërkohë që ai pretendon se është dëmtuar me thikë në dorë dhe në njërin prej veshëve.
Sherri midis dy të rinjve ka nisur për një vend parkimi. Arrestimi i autorit u bë pasi në vendin e ngjarjes i kishin rënë disa dokumente pronësie ku ishte i shkruar edhe emri i tij.
