Aktorja legjendare shqiptare, Tinka Kurti, po kalon vitet e fundit të jetës në një shtëpi të të moshuarve në Tiranë. E njohur për rolet e saj të jashtëzakonshme në skenën e teatrit dhe ekranin e madh, ajo u shfaq mbrëmjen e djeshme në një insert të transmetuar gjatë “Big Brother VIP”, ku dha një mesazh të ngrohtë për aktorin Laert Vasili dhe tregoi për publikun realitetin e saj të tanishëm.
“Laerti të ketë rrugën e mbarë dhe Tinkën të mos e harrojë kurrë. Erdha në këtë shtëpi që e shihni ju, për mua është tragjedi. Këtu ka njerëz të mrekullueshëm. Ne jemi të numëruar në jetë tani, ja na iku Margarita. Për mua ka qenë tronditje e madhe, ne jemi artistë që i kemi shërbyer popullit, do i shërbejmë këtij kombi deri sa të kem i frymën e fundit”, tha ajo me emocion të thellë.
Tinka Kurti, e cila ka interpretuar në më shumë se 260 role teatrore dhe 95 filma, mbetet një figurë kyçe e artit dhe kulturës shqiptare. Me një trashëgimi që kapërcen gjeneratat, ajo është një nga personazhet më të dashura të publikut, që ka lënë gjurmë të pashlyeshme në historinë artistike të vendit.
Por prania e saj në një azil ka ngjallur trishtim dhe reflektim te shumë shqiptarë. Rasti i saj sjell në vëmendje fatin e shumë artistëve të mëdhenj të cilët, pas një jete të përkushtuar ndaj publikut dhe kombit, përballen me vetminë dhe mungesën e vëmendjes institucionale në moshën e tretë.
Ky realitet është një thirrje për të reflektuar mbi mënyrën si shoqëria jonë trajton figurat që kanë kontribuar për trashëgiminë kulturore kombëtare. Nderimi dhe vlerësimi për këta artistë duhet të ndodhë gjatë jetës së tyre, jo vetëm pas ndarjes nga jeta. Ata meritojnë kujdes, mbështetje dhe mirënjohje të vazhdueshme – jo vetëm për atë që kanë bërë, por edhe për atë që përfaqësojnë.
Rasti i Tinka Kurtit nuk është thjesht një histori personale, por një tregues i një problemi më të gjerë shoqëror që kërkon vëmendje, ndërgjegjësim dhe veprim.
