Një lajm i trishtë vjen nga Qendra Spitalore Universitare “Nënë Tereza” në Tiranë, ku mjeku i njohur pediatër, Bashkim Nezaj, ka ndërruar jetë papritur, teksa ishte në krye të detyrës në Spitalin Pediatrik.
Humbja e tij ka tronditur jo vetëm kolegët dhe familjarët, por edhe pacientë që kanë marrë kujdesin e tij ndër vite.
Ngjarja ndodhi në orët e para të mëngjesit të së enjtes, gjatë turnit të natës. Dr. Nezaj pësoi një infarkt, ndërsa ndodhej në shërbim, duke u kujdesur për fëmijët e sëmurë.
Miqtë dhe kolegët kanë shprehur keqardhjen e tyre për ikjen nga kjo jetë të mjekut që njihej për qetësinë dhe përkushtimin që e karakterizonte në misionin për t’i shërbyer të vegjëlve.
Dr. Bashkim Nezaj, me origjinë nga Tropoja, ishte një nga emrat më të respektuar të Pediatrisë Infektive në QSUT. Me mbi dy dekada përvojë, ai ishte një figurë e dashur dhe e vlerësuar nga kolegët dhe pacientët për humanizmin dhe profesionalizmin e tij.
Në një reagim zyrtar, QSUT shpreh dhimbjen për humbjen e Dr. Nezajt:
“Një profesionist i përkushtuar, një njeri i dashur dhe i qetë, që ia kushtoi jetën fëmijëve. Për më shumë se 20 vite, ai qëndroi pranë çdo vogëlushi që kishte nevojë për ndihmë. Humbja e tij është e pazëvendësueshme për ne dhe për të gjithë ata që patën fatin ta njohin.”
Prehu në paqe, doktor Bashkimi. Kujtimi yt do të mbetet i gjallë në zemrat e të gjithë atyre që ndihmove me përkushtim e humanizëm.
