E rëndë në Itali / Ishte zhdukur prej disa ditësh, 14-vjeçarja gjendet e pajetë

Një ngjarje tragjike ka tronditur qytetin e Afragolas në Napoli, ku 14-vjeçarja Martina Carbonaro u gjet e pajetë në një ndërtesë të braktisur pranë ish-stadiumit “Moccia”, vetëm pak metra larg banesës së saj.

Adoleshentja ishte zhdukur prej dy ditësh, ndërsa trupi i saj ishte fshehur nën një dyshek.

Hetimet çuan në arrestimin e Alessio Tucci, 18 vjeç, ish-i dashuri i Martinës, i cili pranoi krimin gjatë marrjes në pyetje.

Ai akuzohet për vrasje të rëndë dhe fshehje të kufomës. Sipas dëshmisë së tij dhe të dhënave nga kamerat e sigurisë, çifti ishte takuar në vendin ku më parë shiheshin shpesh, por takimi përfundoi në tragjedi.

Në kulmin e një debati, i riu dyshohet se e goditi vajzën disa herë në kokë me gur, duke i shkaktuar vdekjen.

Motivi mendohet të ketë qenë ndarja e tyre, të cilën Martina e kishte kërkuar disa ditë më parë.

Nëna e Martinës kishte njoftuar policinë për zhdukjen e vajzës në mbrëmjen e 26 majit, pasi vajza ishte larguar nga shtëpia duke thënë se do të dilte për një akullore me një shoqe.

Kontakti i fundit me familjen ishte një telefonatë ku premtoi se do të kthehej shpejt, por më pas nuk u përgjigj më në telefon.

Pas konfirmimit të vdekjes së vajzës, nëna e saj reagoi në rrjetet sociale me një mesazh të dhimbshëm:

“Kushdo që të ka lënduar, do të paguajë.”

Rasti ka rikthyer në vëmendje pasojat e dhunës në marrëdhëniet adoleshente dhe nevojën për ndërhyrje më të hershme për të parandaluar tragjedi të tilla.