Një tjetër rast i rëndë i dhunës në familje raportohet në Tiranë. Policia bën me dije përmes një njoftimi zyrtar se një 47-vjeçar ka dhunuar psikologjikisht dhe fizikisht gruan e tij dhe si pasojë e gjendjes së rënduar, kjo e fundit ka tentuar vetëvrasje. I arrestuari dyshohet se ka ushtruar dhunë edhe ndaj vajzës, ndërsa bashkëshortja ka tentuar t’i japë fund jetës duke konsumuar fotoksinë.
“Specialistët për Hetimin e Krimeve të Komisariatit të Policisë Nr. 6 arrestuan shtetasin 47 vjeç, banues në Tiranë, pasi dyshohet se ka konsumuar elemente të veprave penale “Shkaktimi i vetëvrasjes” dhe “Dhuna në familje”. Ky shtetas dyshohet se ka ushtruar dhunë të vazhdueshme ndaj bashkëshortes dhe vajzës së tyre, dhe për shkak të dhunës, bashkëshortja ka konsumuar fotoksinë. Ajo ndodhet në spital, në kujdesin e mjekëve”, policia.
