Nëna e Mark Antony Samson, 23-vjeçarit që vrau me thikë studenten shqiptare Ilaria Sula, ka rrëfyer se ka ndihmuar të birin në fshehjen e krimit. Në një dëshmi që zgjati më shumë se tre orë në komisariat, gruaja ka pranuar përpara hetuesve italianë se ka pastruar shtëpinë dhe ka fshirë gjurmët e gjakut pas vrasjes.
“E ndihmova të pastronte shtëpinë, të fshinte gjurmët e gjithë atij gjaku”, është shprehur ajo, sipas agjencisë italiane ANSA. Autoritetet kanë ngritur ndaj saj akuzën për bashkëpunim në fshehjen e trupit të pajetë, ndërkohë që hetuesi gjyqësor e ka cilësuar veprimin e të birit si “të ftohtë dhe pa ndjeshmëri”, duke theksuar se Sula u vra në mënyrë brutale nga një person “të cilit i besonte”.
Sipas të dhënave të hetimeve, nëna e Samson ndodhej në shtëpi në momentin e sulmit. Ilaria Sula, 22 vjeç, kishte pasur një lidhje të shkurtër romantike me Markun dhe u godit me të paktën tre thika në qafë, me një thikë kuzhine. Sulmi ndodhi rreth orës 11:00 të mëngjesit, kur Samson kishte lexuar një mesazh në telefonin e saj nga një tjetër djalë.
Hetuesit italianë dyshuan që në fillim për përfshirjen e nënës në fazën pas krimit. Provat e mbledhura nga celulari i saj e pozicionojnë atë në banesën në via Homs, në lagjen afrikane të Romës. Kjo përforcoi bindjen se djali nuk kishte vepruar i vetëm, ndonëse fillimisht kishte pretenduar të kundërtën gjatë një marrjeje në pyetje që zgjati pesë orë në burgun Regina Coeli.
Pasi e kishte qëlluar viktimën, Samson nisi të hartonte planin për zhdukjen e gjurmëve, duke përfshirë edhe nënën në pastrimin e vendit të krimit. Ende nuk është konfirmuar nëse ajo e ndihmoi të fuste trupin në një valixhe, pas mbështjelljes me një qese plastike dhe vendosjes në një karrocë për transport.
Rreth orës 14:00, ai e kishte tërhequr zvarrë valixhen që përmbante trupin e pajetë dhe e kishte ngarkuar në makinë. Më pas kishte shkuar në zonën e Polit, ku dhe e kishte hedhur karrocën.
Ndërsa hetimet për rolin e nënës po thellohen, autoritetet nuk kanë përjashtuar as përfshirjen e mundshme të babait, i cili mbetet ende nën mbikëqyrje hetimore.
Avokati Paolo Foti, përfaqësuesi ligjor i nënës së të riut, deklaroi për mediat: “Prindërit e djalit janë shkatërruar nga pikëllimi, në mosbesim dhe ende në tronditje. Ata janë të frikësuar dhe kërkojnë falje të sinqertë për gjithçka ka ndodhur.”
Prokuroria po vijon me hetimet për të ndërtuar të plotë skemën e ngjarjes, ndërsa Mark Antony Samson mbetet nën akuzë për vrasje të rëndë me dashje.
