Tashmë është zyrtare. Votat për Albin Kurtin në listën e paraqitur nga Lëvizja Vetëvendosje nuk do të numërohen. KQZ e Kosovës ka konfirmuar se votat për kandidatët e pacertifikuar në zgjedhjet e parakohshme të 14 shkurtit, do të shpallen të pavlefshme.
Një vendim i tillë do të vlejë edhe për Albin Kurtin, liderin dhe kandidatin e VetëVendosjes për kryeministër, i cili kryeson edhe listën. Më parë Lëvizja Vetëvendosje ka deklaruar se do të paraqitet me listen e plotë për 110 vende në parlament që e kryeson Kurti, por rrezikon që të humbasë të gjitha votat që shkojnë për liderin e saj.
Albin Kurti u ndalua nga Gjykata Supreme e Kosovës për të kandiduar në zgjedhjet që do të mbahen së shpejti, pasi ai ka një dënim të formës së prerë me kusht në 3 vitet e fundit. Deri tani sondazhet tregojnë se LVV është partia më e favorizuar për t’i fituar zgjedhjet edhe pse me mungesa të rëndësishme si Kurti apo Albulena Haxhiu.
”Nëse një subjekt politik ka të certifikuar 4 kandidatë dhe në fletëvotim janë shënjuar 5 numra, në FLLK evidentohen këto 5 shënjime, por ato nuk barten të gjitha në Formularët e Rezultateve të Kandidatëve. Në këta formularë bartën vetëm votat e kandidatëve të certifikuar.”- ka sqaruar KQZ.
