Bujar Fandaj, 40 vjeç, është dënuar me burgim të përjetshëm nga Gjykata e Krimeve të Rënda në Treviso, për vrasjen brutale të ish-partneres së tij, Vanessa Ballan, 26 vjeçe.
Ngjarja e rëndë ndodhi më 19 dhjetor 2023, kur Ballan u gjet e pajetë në banesën e saj nga partneri aktual. Ajo kishte plagë të shumta me thikë në trup.
Hetimet çuan menjëherë te Fandaj, me të cilin viktima kishte qenë në një lidhje që kishte përfunduar disa muaj më parë, në verën e po atij viti.
Pas ndarjes, shqiptari kishte vijuar ta përndiqte, duke e kërcënuar dhe duke shpërndarë imazhe intime të saj si formë hakmarrjeje ndaj lidhjes së re të 26-vjeçares. Ai u hetua edhe për përndjekje dhe pornografi hakmarrëse.
Në ditën e krimit, Fandaj hyri me forcë në banesën e Ballan përmes një dritareje dhe e goditi me thikë tetë herë, përpara se të largohej duke tentuar të fshihej dhe të largohej nga Italia.
U kap disa orë më vonë në banesën e tij nga karabinierët. Fillimisht pranoi krimin, por më pas tentoi të ndryshonte dëshminë dhe të mohonte përgjegjësinë.
Vanessa Ballan ishte nënë e një fëmije pesëvjeçar dhe në pritje të një fëmije të dytë. Ajo punonte si arkëtare në një supermarket dhe në kohën e ngjarjes ishte me leje nga puna për shkak të shtatzënisë. Vendimi për dënimin me burgim të përjetshëm për Fandajn u dha sot nga gjykata italiane.
