Opozita parlamentare ka deklaruar pas takimit me kryetarin e Kuvendit Gramoz Ruçi se është e vendosur për të mos e votuar Reformën Zgjedhore, teksa pas kryeparlamentarit kërkuan takim edhe me kryeministrin Edi Rama.
Jashtë dyerve të Kuvendit Nimet Musai deklaroi se janë 31 deputetë që do të votojnë kundër, ndërkohë do të vazhdojnë bisedimet për të bindur edhe pjesën tjetër.
Ndërsa Emond Stojku u shpreh se do të braktisin të gjitha mbledhjet e Komisioneve Parlamentare ku ata janë të emëruar, për sa kohë opinioni i tyre nuk është marrë parasysh.
ABC News raporton së fundmi se krerët e grupeve të opozitës parlamentare do të takohen me kryeministrin Edi Rama në selinë e Kuvendit në orën 19:00 të pasdites së sotme.
Ata janë shprehur se nuk do të votojnë reformën në Kuvend, nëse nuk merren parasysh kushtet e tyre për lista të hapura dhe votën e emigrantëve.
Më herët ditën e sotme, Rama tha se pozita e tyre është e kuptueshme për sa kohë është në mes ekzistenca e tyre në Kuvend, ndërsa me ironi u shpreh se ata janë të Bashës dhe Kryemadhit dhe nuk kanë dalë nga materniteti i Taulant Ballës.
Kreu i qeverisë deklaroi se marrëveshja nuk prodhoi asgjë të re, përveç kënaqësisë së Lulzim Bashës për të arritur atë që ai donte, por që gjithsesi nuk është më e mirë se ajo që kishim në fillim.
