Pasditen e 23 gushtit, kryeministri Edi Rama është parë duke konsumuar një kafe në një nga hotelet në Greqi.
Media greke “Trikalavoice.gr”, botoi një artikull ku thuhej se kryeministri shqiptar, ndodhej në Trikala.
Lidhur me këtë artikull, ka reaguar edhe kryeministri Rama, i cili e ka cilësuar këtë media një “kazan”, ashtu siç edhe ka cilësuar shumë media shqiptare.
Nga ana tjetër, gazetari grek Vasilis Aleksiu, ka reaguar pas deklaratës në Twitter se media greke është kazan, i cili është shprehur se nuk ka arsye përse të gënjejnë.
Sipas “Dosja.al”, gazetari Aleksiu ka shtuar se ai po drekonte i vetëm gjatë orës 15:00-17:00 të pasdites, më datë 23 gusht.
Gazetari ka thënë se e kishin marrë në telefon drejtuesit e hotelit që e kishin njoftuar për praninë e Ramës në ambientet e biznesit të tyre. Gjithashtu ka shtuar se nuk ka mundur dot të bëjnë as foto, pasi Rama ruhej nga trupa të shumtë sigurie.
“E publikova atë lajm, pasi kontaktova me drejtues të hotelit. Ata më morën në telefon dhe më thanë se Rama ishte në ambjentet e tyre, kishte ngrënë drekë dhe se tashmë po konsumonte një kafe i vetëm.
Nuk kisha foto sepse askush nga personat që ndodheshin në hotel nuk mundën të shkrepnin asnjë. Kryeministri shqiptar ruhej nga shumë truproja. Unë kam shumë besim tek drejtuesit e atij hoteli në Trikalla. Ata nuk kanë arsye të sajojnë diçka të tillë,”- thotë gazetari grek Vasilis Aleksiu.
E ndërsa kryeministri shqiptar, Edi Rama, ka reaguar dy herë në rrjetin social Twitter, ku ka thënë edhe se nuk ka pushuar jashtë vendit që prej vitit 2013.
