Autoritetet iraniane kanë bërë të ditur arrestimin e 700 personave gjatë konfliktit 12-ditor, të cilët akuzohen si pjesë e rrjeteve të spiunazhit dhe sabotimit të lidhura me Izraelin.
Sipas agjencisë shtetërore Fars, të ndaluarit janë identifikuar falë informacioneve nga publiku dhe operacioneve të inteligjencës.
Ndërkohë, Mossadi ka pranuar përfshirjen e personelit të tij në operacionin “Rising Lion”, që nisi më 13 qershor me sulme ndaj objektivave iraniane.
Izraeli ka publikuar edhe pamje të agjentëve të tij që operonin në territorin iranian, duke përgatitur baza për lëshimin e dronëve.
Këto zhvillime kanë nxitur frikë dhe pasiguri brenda strukturave shtetërore të Iranit. Si reagim, autoritetet kanë arrestuar dhjetëra qytetarë të tjerë, të cilët akuzohen për mbështetje të Izraelit përmes publikimeve online. Ata u cilësuan si kërcënim për “sigurinë psikologjike të shoqërisë”.
Në kuadër të kësaj vale ndëshkimesh, është krijuar edhe një njësi e posaçme brenda zyrës së Prokurorit të Teheranit për të monitoruar median dhe rrjetet sociale.
Arrestimet janë kryer në disa provinca, përfshirë Kermanshah, Isfahan, Khuzestan, Fars dhe Lorestan, ndërsa për numrin e të ndaluarve në Teheran ende nuk ka informacion zyrtar.
Mediat iraniane raportojnë se disa nga të dyshuarit janë ekzekutuar që nga nisja e konfliktit.
