Ditën e djeshme, kryeministri Edi Rama tha nga foltorja e Kuvendit, se në Durrës është një prokuror që punon për grupet kriminale.
“Dosja.al” ka mësuar se bëhet fjalë për prokurorin Arjan Ndoja.
Emri i tij është lakuar një vit më parë nga avokati i Lul Berishës, Ilia Ilia.
Ky i fundit është dhunuar nga dy persona pas daljes nga gjykata, më 19 korrik të 2018-ës.
Avokati akuzoi se pas sulmit fshihet Ndoja, me të cilin kishte debatuar gjatë një seance gjyqësore.
“Kam dalë nga seanca gjyqësore e Gjykatës së durrësit rreth orës 10:30 dhe po ikja nga Prokuroria. Më del një person përpara dhe më thotë ti je ai që i ke bërë karshillëk prokurorit Arjan Ndoja dje në seancë gjyqësore, ke bërë të fortin. I thash kush je ti, ai më ofendoi, i ktheva të njëjtën përgjigje. Jam goditur nga ky dhe personi tjetër që erdhi. Dje në seancë gjyqësore më kanosi prokurori”, deklaroi avokati Ilia në atë kohë.
Nga hetimet e kryera, rezultoi se një prej personave që dhunoi avokatin është Mondi Voga, i cili është mik i ngushtë me prokurorin Ndoja.
Ai arriti të shfajësohej, duke thënë se ka pasur një debat me avokatin, por nuk kishte lidhje me ngjarjen.
Ndoja u denoncua edhe nga zv.kryeministri Erion Braçe, i cili u shpreh se ky prokuror punon për grupet kriminale në Durrës, si dhe ka ushtruar presion mbi ish-drejtorin e Kadastrës së Durrësit, Liridon Pula.
Ky i fundit është lënë në burg ditën e sotme nga Gjykata e Durrësit.
Pula u arrestua disa ditë më parë, së bashku me disa zyrtarë të tjerë, të cilët akuzohen për tjetërsim pronash në bregdet.
Prokurori i kësaj çështje është pikërisht Arjan Ndoja.
