Një tjetër rast tronditës dhune mes të miturve ka ndodhur në zemër të Tiranës, ku dy vajza të moshës 12 dhe 15 vjeç janë sulmuar brutalisht nga një grup prej nëntë bashkëmoshataresh. Ngjarja, e cila është bërë publike përmes emisionit “Fiks Fare”, tregon rritjen alarmante të dhunës tek adoleshentët.
Sipas denoncimit të dy nënave, vajzat janë dhunuar në Bulevardin “Dëshmorët e Kombit” pa asnjë paralajmërim. “I thirrën, i ofenduan dhe më pas i sulmuan. Njërën prej tyre e shtrinë në tokë, tentuan ta zhveshin dhe filmuan gjithçka,” deklaroi një prej nënave, duke treguar tronditjen dhe pasojat psikologjike që po kalon vajza e saj.
Videoja e ngjarjes është shpërndarë në rrjetet sociale, duke lejuar edhe identifikimin e autoreve, të cilat, sipas prindërve, banojnë në zonën e Yzberishtit. Por edhe pse identiteti i dhunueseve është bërë i ditur, prindërit shprehen se policia nuk ka ndërmarrë asnjë veprim konkret.
Sipas dëshmive, vajzat dhunuese kishin dalë me qëllimin e qartë për të gjetur një viktimë, ta dhunonin, ta filmonin dhe më pas të shantazhonin për para. Prindërit tregojnë se dhunueset madje kishin shkuar vetë në polici për të denoncuar viktimat, pasi kishin arritur t’i identifikonin familjet e tyre. “Vajzat tona nuk i njihnin fare. Ishin thjesht në vendin e gabuar, në momentin e gabuar,” thonë ata.
Por ajo që i ka tronditur më shumë prindërit është reagimi – apo më saktë mungesa e reagimit – nga autoritetet. “Në Komisariatin Nr. 1, na u tha se nuk kanë çfarë të bëjnë, sepse është konflikt mes të miturve dhe vetëm nëse ndodh një vrasje mund të ndërhyjnë. Na fajësuan neve për mënyrën si i kemi rritur fëmijët,” tregojnë të indinjuara nënat.
Ndërkohë, për viktimat jeta është kthyer në një makth të përditshëm. Vajzat nuk shkojnë më në shkollë, jetojnë me frikë, ndërsa dhunueset janë të lirshme dhe vazhdojnë t’i kërcënojnë përmes rrjeteve sociale.
Prindërit i bëjnë thirrje institucioneve për drejtësi dhe mbrojtje. “Nuk dua që fëmija im të bëhet viktimë e radhës për t’u kujtuar se duhet vepruar më herët,” shprehet një prej nënave, duke përmendur një rast të mëparshëm tragjik, ku një 15-vjeçar humbi jetën pas një konflikti të ngjashëm.
Ngjarja mbetet pa përgjigje nga autoritetet, ndërsa familjet kërkojnë urgjentisht ndërhyrje për të ndalur dhunën mes të miturve, që në këtë rast mori përmasa ekstreme dhe të rrezikshme për jetën e fëmijëve.
