Policia e Tiranës ka vijuar operacionin e koduar “Pako 2”, që synon goditjen e trafikimit të lëndëve narkotike përmes shërbimeve postare.
Në kuadër të këtij operacioni është arrestuar Gersian Picaku, 23 vjeç, banues në Tiranë, i dyshuar si porositësi i një pakoje me rreth 1.07 kilogramë kanabis, e dërguar nga Shtetet e Bashkuara të Amerikës.
Kapja e tij u bë e mundur falë bashkëpunimit mes Shërbimeve të Qarkullimit Rrugor dhe Seksionit të Narkotikëve, me mbështetje nga inteligjenca policore.
Më herët, në të njëjtin operacion ishte arrestuar 19-vjeçari M.H., i cili kishte marrë pakon në fjalë.
Njoftimi i Policisë:
Tiranë/Vijon operacioni policor i koduar “Pako 2”, kundër veprimtarisë kriminale të trafikimit të lëndëve narkotike, nëpërmjet shërbimit postar.
Lokalizohet, kapet dhe vihet në pranga porositësi i pakos me rreth 1.07 kilogramë Cannabis.
Shërbimet e Qarkullimit Rrugor në bashkëpunim me Seksionin e Narkotikëve, në vijim të operacionit policor”Pako 2” , si rezultat i kontrolleve të mbështetura te inteligjenca policore, lokalizuan, kapën dhe ndaluan shtetasin Gersian Picaku, 23 vjeç, banues në Tiranë.
Ky shtetas dyshohet se ka porositur një pako me rreth 1.07 kilogramë Cannabis, të trafikuar nga ShBA. Pakoja u mor nga 19-vjeçari M. H, i arrestuar 3 ditë më parë, po në kuadër të këtij operacionit.
Materialet procedurale iu referuan Prokurorisë së Tiranës, për veprime të mëtejshme.
