Prokuroria e Posaçme ka dalë në përfundimin se Gentian Sula, administrator dhe një nga ortakët e shoqërisë së sigurimeve “Intersig-Viena Insurance Group”, ka ndihmuar në mënyrë të drejtpërdrejtë Ajola Xoxan, bashkëshorten e kryetarit të arrestuar të Bashkisë së Tiranës, Erion Veliaj, për të realizuar një skemë të dyshuar pastrimi parash. Megjithatë, ndonëse provat e mbledhura e lidhin ngushtë me këtë veprimtari, emri i Sulës nuk është përfshirë në listën e episodeve korruptive të renditura në aktin e marrjes së Xoxas të pandehur, miratuar më 23 korrik 2025. Ky fakt ngre pikëpyetje mbi qëndrimin e SPAK-ut ndaj tij.
Vilë luksoze në zemër të Bllokut, pa qira për OJQ-të e Ajolës
Hetimet njëvjeçare të SPAK-ut kanë dokumentuar se Ajola Xoxa ishte pronare dhe drejtuese faktike e disa kompanive dhe organizatave joqeveritare, të regjistruara formalisht në emër të personave të tjerë. Shumica e këtyre subjekteve kanë siguruar fonde publike nga Bashkia e Tiranës, gjatë drejtimit të Veliajt, dhe këto para janë transferuar përfundimisht në llogaritë e Xoxas përmes transaksioneve të sinkronizuara.
Një prej këtyre OJQ-ve ishte qendra artistike “Nan Gallery”, e themeluar në korrik 2023 nga artisti Driant Zeneli. Pas pak muajsh, ajo iu dhurua organizatës “Harabel” të Ajola Xoxas. Pas marrjes së kontrollit, “Nan Gallery” zhvilloi aktivitetin e saj në një vilë dykatëshe me sipërfaqe rreth 270 m², e pozicionuar në një nga zonat më të shtrenjta të Tiranës, në ish-Bllok. Vila rezulton në pronësi të Gent Sulës dhe bashkëjetueses së tij, B.A.
SPAK ka provuar se vila iu dha Ajola Xoxas për përdorim pa pagesë, nën justifikimin e një sponsorizimi për artin. Në dëshminë e tij, Sula ka pretenduar se “Intersig-Viena Insurance Group” ka një politikë mbështetjeje për artin dhe kulturën, dhe në këtë kuadër mbështeti edhe qendrën “Nan Gallery”. Por prokurorët nuk e kanë konsideruar bindëse këtë version, pasi prona ishte private dhe jo e kompanisë së sigurimeve, ndërsa më parë ishte dhënë me qira duke gjeneruar të ardhura të larta për shkak të vendndodhjes.
Deklarata të pabesueshme dhe revokim i marrëdhënies pas kontrollit të BKH-së
Në dosjen penale, hetuesit theksojnë se shumica e deklarimeve të Gent Sulës nuk mbështeten nga provat e mbledhura dhe se disa prej tyre vërtetojnë marrëdhënien direkte me Xoxan për dhënien falas të vilës. Sipas SPAK-ut, bashkëpronarët e godinës, përfshirë bashkëjetuesen e Sulës, dhanë dakordësinë për ta lënë vilën në përdorim pa asnjë dokument të shkruar, ndonëse më parë ajo kishte qenë e dhënë me qira.
Prokuroria e Posaçme është bindur se dhënia e vilës pa qira ishte një marrëdhënie fiktive. Kjo bindje u forcua kur, pas kontrolleve nga Byroja Kombëtare e Hetimit, e drejta e përdorimit pa shpërblim u ndërpre dhe u formalizua me një akt të shkruar, duke konfirmuar kështu se “sponsorizimi” nuk ishte i rregullt.
Dyshime të forta, por asnjë akuzë
Ky episod është vetëm një nga disa rastet që lidhin administratorin e “Intersig-Viena Insurance Group” me interesat financiare të Ajola Xoxas. Veprimet e tij nuk ndryshojnë në thelb nga ato të disa biznesmenëve të tjerë që aktualisht janë të pandehur në dosjen “Veliaj-Xoxa”. Megjithatë, deri tani SPAK nuk ka ngritur akuza ndaj Sulës, duke ngritur dyshime mbi standardin e ndjekur për personat e përfshirë në këtë çështje.
