Deputetja e Partisë Socialiste, Klotilda Bushka, është paraqitur sot në Prokurorinë e Posaçme, e shoqëruar nga avokati i saj Henrik Ligori. Ajo është nën hetim për pengim të hetimeve që SPAK po zhvillon ndaj kryebashkiakut të Tiranës, Erion Veliaj.
Dyshohet se Bushka ka udhëzuar dëshmitarët se çfarë të deklaronin lidhur me hetimin.
Bushka, është kryetare e Komisionit të Ligjeve, është nën hetim për përfshirjen në dosjen “Veliaj”, për veprime që pengojnë zbardhjen e së vërtetës. Kryebashkiaku i Tiranës, Erion Veliaj, u arrestua më 10 shkurt nën akuzat për korrupsion dhe pastrim parash, të ngritura nga SPAK.
Sipas njoftimit të prokurorisë, përveç Veliajt, është vendosur nën hetim edhe deputetja Bushka, e cila akuzohet për pengimin e hetimeve lidhur me skemën korruptive të lidhur me kryebashkiakun.
“Prokuroria e Posaçme po kryen hetime paraprake ndaj deputetes së Kuvendit të Shqipërisë, shtetases K. B. Emri i kësaj të fundit është regjistruar në regjistrin përkatës të njoftimeve si person i dyshuar për kryerjen e veprës penale të “Veprime që pengojnë zbulimin e së vërtetës”, parashikuar nga neni 301 i Kodit Penal. Deri në këtë fazë konstatohet se ekzistojnë të dhëna konkrete të cilat të çojnë tek dyshimi i arsyeshëm se personi nën hetim K. B. ka kryer veprime aktive të kundërligjshme të cilat kanë interferuar me hetimin e organit procedues në lidhje me procedimin penal nr. 27 të vitit 2024”, thuhej në njoftimin e SPAK.
