Gruaja e biznesmenit Elman Abule, Marisa Nito, është paraqitur sot në ambientet e Prokurorisë së Posaçme, në kuadër të hetimeve që lidhen me dosjen ndaj kryebashkiakut të Tiranës, Erion Veliaj.
Dyshohet se dëshmia e saj ka lidhje me aktivitetin e bashkëshortit të saj, i cili ndodhet në “arrest shtëpie” dhe është nën hetim për pastrim parash si pjesë e të njëjtës çështje.
Kjo është hera e dytë që Nito paraqitet në SPAK. Në janar ajo u pyet për marrëdhëniet me Ajola Xoxën, bashkëshorten e Veliajt.
Hetimet kanë zbuluar komunikime që tregojnë për një lidhje tregtare mes dy grave, përtej marrëdhënies së deklaruar si miqësore.
Elman Abule u arrestua më 10 shkurt, por Apeli i Gjykatës së Posaçme ndryshoi masën në “arrest shtëpie” më 13 mars.
Ndërkohë, për personazhe të tjerë të dosjes si Shkëlqim Fusha, Gentian Sula dhe Meriman Palushi është lënë në fuqi masa “detyrim paraqitje”.
Në qendër të kësaj çështjeje qëndron Erion Veliaj, i cili u ndalua në zyrën e tij më 10 shkurt, si i dyshuar për korrupsion pasiv në bashkëpunim në nëntë raste dhe pastrim parash.
SPAK pretendon se Veliaj dhe bashkëshortja e tij kanë krijuar një skemë për përfitime të paligjshme nga fondet publike të Bashkisë së Tiranës, me qëllim pasurimin personal përmes veprimeve të kamufluara.
