Prokuroria e Posaçme kundër Korrupsionit dhe Krimit të Organizuar ka dërguar për gjykim një fraksion të ri të dosjes së njohur “Toyota Yaris”.
Tashmë përballë drejtësisë do të dalin biznesmeni Astrit Vladi dhe avokatja Erida Lazimi, të akuzuar për ushtrim të ndikimit të paligjshëm ndaj një gjyqtari.
Sipas SPAK, në shtator të vitit 2020, në një kohë kur po zhvillohej seanca paraprake ndaj vëllait të Astrit Vladit, Elvis Vladi, i akuzuar për pastrim parash dhe përfshirje në grup kriminal, biznesmeni i kërkoi avokates Erida Lazimi të ndërhynte në mënyrë të jashtëligjshme tek gjyqtari i çështjes.
Dyshohet se Lazimi pranoi ta ndërmjetësonte këtë ndikim në këmbim të përfitimeve monetare.
Astrit Vladi është vëllai i Elvis Vladit, i përfshirë në një nga skemat e dyshuara të pastrimit të parave që lidhet me gjetjen e 3.4 milionë eurove në makinat Toyota në portin e Durrësit në vitin 2018, ngjarje që tronditi politikën dhe sistemin e drejtësisë shqiptare.
Procedimi penal ndaj Vladit dhe Lazimit është ndarë nga dosja më e madhe, që përfshin edhe akuza për korrupsion pasiv ndaj gjyqtarëve dhe prokurorëve, trafikim të lëndëve narkotike dhe pastrim parash.
Në përfundim të hetimeve, SPAK ka ngritur zyrtarisht akuzën ndaj Astrit Vladit për “Ushtrim të ndikimit të paligjshëm ndaj personave që ushtrojnë funksione publike”, ndërsa ndaj Erida Lazimit për të njëjtën vepër penale, por me përfitim të parregullt në formë monetare.
Sipas aktakuzës, ngjarja ka ndodhur më 14 shtator 2020, në Gjykatën e Shkallës së Parë në Tiranë, gjatë shqyrtimit të çështjes ndaj Elvis Vladit, Alfred Vladit dhe Alban Mollaymerit, të cilët akuzoheshin për mosdeklarim të shumave të mëdha në kufi.
