Seanca gjyqësore për çështjen penale të njohur si “Metamorfoza” u shty sërish, këtë herë për shkak të mungesës së avokatëve mbrojtës në sallën e gjyqit.
Gjyqi do të rifillojë më 5 qershor, ora 15:00, sipas njoftimit zyrtar të gjykatës.
Asnjë prej të pandehurve nuk ishte i pranishëm fizikisht në sallë, pasi të gjithë kanë zgjedhur të përfaqësohen nga mbrojtësit e tyre ligjorë.
Ndërkohë, avokatja e Astmer Bilalit është gjobitur me 30 mijë lekë të reja për mungesë të pajustifikuar, dhe afatet e paraburgimit për të arrestuarit janë pezulluar deri në mbajtjen e seancës së radhës.
Dosja “Metamorfoza” është një prej hetimeve më të mëdha të ndërmarra nga SPAK dhe përfshin figura të larta të shtetit dhe botës së krimit.
Ndër personat e arrestuar janë ish-drejtori i Forcave Operacionale në Policinë e Shtetit, Oltion Bistri, drejtuesi i Prokurorisë së Kukësit, Xhevahir Lita, biznesmeni Pëllumb Gjoka, si dhe të dyshuarit Astmer Bilali, Ardit Hasanbenga dhe Edmond Preka.
Oltion Bistri akuzohet për “shpërdorim detyre” dhe nxjerrje të dokumenteve sekrete, ndërsa prokurori Lita për korrupsion.
Ish-zyrtari i Policisë së Shkodrës, Ardit Hasanbenga, dyshohet se ka ndihmuar grupin Bajri në një tentativë për të vrarë Ibrahim Licin.
Pjesa më e madhe e të dyshuarve të tjerë ndodhen ende në arrati, përfshirë emra të njohur të botës së krimit si, Ervis Martinaj, Denis Bajri, Klaudio Haka, Prek Kodra, Aleks Ndreka, Arsat Bashli, Bardhyl Marvraj dhe Elion Hato.
