Donald Trump ka reaguar për herë të parë pas vendimit të Gjykatës në New York për ta shpallur fajtor. Në një mesazh të gjatë në platformën e tij “Truth Social”, ai kërkoi të minimizonte provat në gjyq duke pretenduar se nuk ishte i përfshirë në shkrimin e shpenzimeve ligjore në të dhënat e biznesit dhe duke shprehur mosbesimin se një gjë e tillë do të konsiderohej krim.
Ish-avokati i presidentit amerikan, Michael Cohen, ishte përgjegjës për kryerjen e pagesës për yllin e porno filmave, Stormy Daniels, e cila u pagua për të heshtur në prag të zgjedhjeve të 2016-ës.
Duke iu referuar kësaj, Trump shtoi se avokati i tij në atë kohë, bëri praktikisht gjithçka në lidhje me NDA (marrëveshje për mos zbulimin) duke supozuar se ajo që bëri ishte e saktë. Trump tha se ai nuk bëri asgjë të gabuar dhe tha se NDA-të janë standarde, të përdorura zakonisht dhe ligjore.
Trump më pas doli në një konferencë shtypi ku e cilësoi gjyqin të padrejtë.
“Për sa i përket vetë gjyqit, ishte shumë i padrejtë. Ne nuk na lejuan të përdornim ekspertin tonë zgjedhor në asnjë rrethanë. E patë se çfarë ndodhi me disa nga dëshmitarët që ishin në anën tonë, ata u kryqëzuan nga ky njeri”, tha ai.
Trump u shpall fajtor në 34 akuza gjersa më 11 korrik do të bëhet me dije forma e dënimit, burg apo para ose te dyja.
