Kryeministri Rama dhe presidenti Meta vazhdojnë debatin në distancë për Kodin Zgjedhor. “Marrëveshja e 5 qershorit është zbatuar” deklaroi Rama sot në mëngjes duke iu përgjigjur Metës, i cili e quajti pinok se nuk respekton paktin.
Ndërsa, presidenti Ilir Meta ka deklaruar se do të kthejë në Kuvend projekt-ligjin për Kodin Zgjedhor, kryeministri Edi Rama tha se nëse Meta vepron në këtë mënyrë, atëherë kërkesa e tij do të rrëzohet.
Rama u pyet edhe për planin 5 pikësh të kreut të PD-së Lulzim Basha, duke thënë se “nuk ia ka idenë këtij lloj plani”.
“Nëse presidenti Ilir Meta dërgon në Kuvend kthim të Kodit Zgjedhor, do të rrëzohet. Nuk ia kam idenë për plan me 5 pika të Lulzim Bashës. 5 qershori është respektuar. 30 qershori është respektuar dhe nuk ka asgjë më për të thënë dhe s’ka kohë për të humbur. Presidenti bën mirë ta firmosë ose ta ktheje sa më parë. Pasi nuk ma më kohë për implementimin”, tha ndër të tjera Rama.
Kryeministri foli pas një mbledhje të shkurtër që bëri sot me të gjithë drejtuesit politikë të qarqeve të Partisë Socialiste. Zgjedhjet e 25 prillit, organizimi, marrja e një feedback-u nga elektorati dhe intensifikimi i punës ishte në fokus të takimit. Mësohet se drejtuesit politikë paraqitën raportet e përjavshme të punës në terren. Takimi i Ramës me drejtuesit e PS-së zgjati mbi 30 minuta, ndërsa ai pas përfundimit të mbledhjes dha dhe një prononcim për mediat. Gjatë deklaratës së tij ai theksoi se maxhoranca do të vijojë me zbatimin e kodit zgjedhor.
Ndërkaq, Presidenti Meta vazhdon të këmbëngulë për marrëveshjen e 5 qershorit, për ndryshimet e njëanshme të Kodit Zgjedhor nga mazhoranca. Një ditë më parë, Rama e kishte sulmuar duke thënë tha se nuk e prisja që Presidenti “të shkallonte”.
“Meqenëse Kryepinoku Rilindas u justifikua për zgjedhjen e detyruar para tre vitesh të “Presidentit të shkalluar”, më duhet t’ju kujtoj të gjithë socialistëve se Ilir Meta ka mbajtur çdo premtim për mbrojtjen e Kushtetutës dhe interesit kombëtar. Tani ju e kuptoni se çdo njeri që nuk blihet e frikësohet prej tij është “i shkalluar”.
Bën mirë të reflektojë dhe të respektojë 5 Qershorin se përndryshe në 25 Prill do të ketë jo vetëm një President “të shkalluar”, por edhe tre milionë shqiptarë “të shkalluar” që do shkallmojnë me votë dhe çdo mjet legjitim ëndrrat e tij për të blerë e trembur popullin shqiptar për një grusht oligarkësh e banditësh”, shkruan Meta, teksa ka publikuar fjalimin e tij në Kuvend ditën që u zgjodh president.
/Gazeta Reforma/
