Kryebashkiaku i Rrogozhinës, Edison Memolla, ka njoftuar se do të apelojë vendimin e Gjykatës së Posaçme, e cila e dënoi me 1 vit burg.
Në një postim në rrjetet sociale, Memolla ka theksuar se do të vazhdojë të qëndrojë në detyrë deri në marrjen e një vendimi të formës së prerë.
Ai gjithashtu ka falenderuar të gjithë ata që e kanë mbështetur gjatë këtyre momenteve të vështira.
Njoftimi:
“Që kur mu besua detyra e përfaqësuesit të popullit tim, kam qenë në dijeni për peshën që do sillte në çdo dimension të sajin.
Drejtësinë e Re e kam mbështetur fuqimisht dhe si rrjedhojë jam i hapur të pranoj çfarëdolloj vendimi të dhënë kundrejt meje, por kjo nuk më pengon të apeloj një vendim i cili nuk është i mbështetur aspak në prova dhe fakte.
Theksoj se deri në një vendim të formës së prerë e më tej, unë jam kryetar i bashkisë Rrogozhinë, në krye të detyrës dhe i vetdijshëm për të gjitha përgjegjësitë që ky post sjell.
Së fundmi, ju falenderoj nga zemra të gjithë ju që keni qenë pranë meje duke më njohur, mbështetur si njeri, duke besuar të vërtetën time të pafajshme dhe s’më keni kthyer shpinën edhe kur situata duket e vështirë”, shkruan Memolla.
