Prokuroria e Tiranës ka sekuestruar një apartament dhe dy automjete të dyshuara si të përfituara nga aktiviteti kriminal i një personi të dënuar për trafikim të qenieve njerëzore.
Pasuritë, në emër të shtetasit Adriatik Gjinesi, përfshijnë një apartament banimi dhe dy makina të markave “Renault Scenic” dhe “Lancia Musa”.
Nga hetimet rezulton se Adriatik Gjinesi nuk justifikon dot me të ardhura të ligjshme blerjen e këtyre pasurive.
Dyshohet se ato janë përfituar me paratë që i biri, Ismail Gjinesi, ka siguruar nga trafikimi i vajzave për qëllime prostitucioni drejt Italisë.
Ismail Gjinesi është arrestuar dhe dënuar për veprën penale “Trafikim i personave të rritur”, pasi nga hetimet është provuar se vepronte në bashkëpunim me persona të tjerë për rekrutimin dhe dërgimin e vajzave jashtë vendit.
Në vitin 2015, ndaj tij u caktua masa e sigurisë “arrest në burg” nga Gjykata e Krimeve të Rënda.
Njoftimi i Porkurorisë së Tiranës
Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, u sekuestruan pasuritë e shtetasit A.Gj., një apartament dhe dy makina, si person i lidhur me shtetasin I.Gj, i cili është subjekt i hetimit pasuror në bazë të ligjit ‘Për parandalimin dhe goditjen e krimit të organizuar’.
Nga hetimet e kryera në kuadër të procedimit pasuror nr.81, viti 2020, mbi shtetasin I.Gj., i dënuar dhe arrestuar për veprën penale ‘Trafikim i personave të rritur’ parashikuar nga neni 110/a/2 i Kodit Penal, ka dyshime se pasuria e vënë prej tij ose familjarëve të tij nuk përputhet me të ardhurat e ligjshme.
Ky shtetas, në bashkëpunim me persona të tjerë rekrutonin vajza për prostitucion në drejtim të Italisë dhe pas kryerjes së veprimeve hetimore, në vitin 2015, Gjykata e Shkallës së Parë për Krimet e Rënda, Tiranë, caktoi masën e sigurimit ‘Arrest në burg’.
Nga hetimet e shtrira tek personat e lidhur me të, rezultoi se i ati i tij, shtetasi A.Gj., me balancë negative në banka, nuk justifikon me të ardhurat blerjen e një apartamenti dhe dy makinave në pronësi të tij. Këto pasuri të paluajtshme, dyshohet se janë fituar nga personi i lidhur A.Gj., si rezultat i përfshirjes së djalit të tij të dënuar I.Gj. nga aktiviteti kriminal në ‘Trafikimin e personave të rritur”.
Për sa më sipër, Prokuroria pranë Gjykatës së Shkallës së Parë të Juridiksionit të Përgjithshëm, Tiranë, kërkoi sekuestrimin e pasurive në emër të shtetasit A.Gj si më poshtë:
Pasuri e paluajtshme, apartament nr. 3 me sip 117.78 m,2, Pallatet “SANDY” Sh.P.K, Tiranë;
Pasuri e luajtshme, automjet tip “Renault Scenic”; dhe
Pasuri e luajtshme, automjet tip “Lancia Musa”.
