Policia e Shtetit ka marrë masa të rrepta sigurie mbrëmjen e sotme, ku priten protesta në ditën e tyre të gjashtë pas vrasjes së 25-vjeçarit Klodian Rasha nga efektivi.
Civilë dhe policë me uniformë kanë rrethuar nga të katërta anët sheshin “Skënderbej”, duke kontrolluar imtësisht grupet me dy apo më shumë të rinj të cilët tentojnë të hyjnë në shesh dhe më pas të marrin drejtimin drejt Bulevardit “Dëshmorët e Kombit”.
Ndërkohë kontrollet e rrepta dhe të shtuara, vijnë vetëm pak minuta para nisjes së një proteste të mundshme për vrasjen e Klodian Rashës.
Gjatë ditës së sotme, thirrjet për protestë në rrjetet sociale kanë qenë më të pakta se në protestat e mëparshme.
Të rinjtë që i janë afruar sheshit “Skënderbej” këtë pasdite, janë ndaluar nga patrulla të shumta policisë, të cilët i kanë kërkuar të rinjve kartat e identitetit, ose kanë kontrolluar çantat e tyre të shpinës./Gazetareforma.com/
