Izraeli ka liruar 90 të burgosur palestinezë, më shumë se shtatë orë pas lirimit të tre pengjeve izraelite nga Hamasi. Një autobus me të burgosur palestinezë u largua nga burgu Ofer, pranë Ramallahut, në orët e para të mëngjesit të së hënës.
Sipas Komisionit për Çështjet e të Burgosurve të Autoritetit Palestinez, të gjithë të liruarit janë gra ose të mitur, të arrestuar për akuza që variojnë nga gjuajtja e gurëve deri te tentativa për vrasje.
Lirimi i tyre ndodhi gjatë fazës së parë të një armëpushimi të planifikuar në tre etapa, i cili nisi me vonesë të dielën, për shkak të mosmarrëveshjeve mbi listën e pengjeve të Hamasit.
Faza e Parë e Armëpushimit
Në kuadër të kësaj marrëveshjeje, Hamasi ka liruar tre gra izraelite, Romi Gonen, Emily Damari dhe Doron Steinbrecher. Të cilat janë transferuar në një spital në Tel Aviv, ku po marrin trajtim dhe raportohet se janë në gjendje stabile. Në këmbim të çdo pengu të liruar nga Hamasi, Izraeli pritet të lirojë 30 deri në 50 të burgosur palestinezë.
Faza e Dytë dhe e Tretë
Faza e dytë synon një armëpushim të përhershëm dhe tërheqjen e plotë të trupave izraelite nga Gaza. Ndërsa në fazën e tretë, Hamasi do të dorëzojë trupat e pengjeve që kanë humbur jetën në robëri, në këmbim të një plani për rindërtimin e Gazës nga Izraeli.
Rose Khwais, njëra nga të burgosurat e liruara, ka ndarë detaje rreth kushteve të rënda të burgimit. Ajo përmendi mungesën e trajtimit mjekësor dhe ndërlikimet shëndetësore që përjetoi gjatë kohës së saj në burg. “Ne e shihnim qiellin vetëm përmes dritareve të vogla me hekura,” tha ajo.
