Naftëtaret greviste në Ballsh janë janë futur në ditën e 11-të të grevës së tyre ndërkohë gjendja e tyre shëndetësore vijon të përkeqësohet, pasi mbrëmjen e kaluar njëra prej tyre u nis me urgjencë drejt spitalit pasi gjendja e saj u rëndua.
Gratë naftëtare shprehen se do të vazhdojnë grevën deri sa të marrin rrogat që u takojnë pasi fëmijët në shtëpi i presin për ushqime.
“Padyshim do ta vazhdojmë, nuk kemi se ku të shkojmë. Të na japin lekët të ushqejmë fëmijët, na presin të shkojmë me lekë në shtëpi, t’u blejmë bukë dhe ilaçe” tha njëra prej tyre.
Ndërkohë në lidhje me thirrjen e kryeministrit për ndërprerjen e grevës si kusht për të negociuar, një tjetër prej grave e cilësoi si papërgjegjshmëri, pasi theksoi se nuk po kërkojnë lëmoshë, por djersën e tyre.
“Kjo është papërgjegjshmëri e kryeministrit që thotë këtë, sepse në një shtet demokratik nuk e kuptoj sesi thotë negocio për bukën e gojës. Për cfarë? Kur ne e kemi thënë shumë qartë, për bukën e fëmijës nuk negociohet, sepse nuk e kërkojmë të na e falë të na japë lëmoshë, por djersën tonë. Kryeministri thotë hajde ta neogicojmë, cfarë është kjo papërgjegjësi e kryeministrit që thotë hajde negociojmë, ne duam lekët që kemi punuar.
Kauza jonë do të vazhdojë, ne nuk lëvizim pa fituar pagat e fituara me gjyq, 13. Të negociojmë për fillimin e punës. Kauza jonë është e drejtë, do të vijojmë deri kur të marrim përgjigje. Shoqja jonë mbrëmë ishte në gjendje të rëndë, ka probleme me sëmundje profesionale të marra në uzinë, me stomakun.”
