Çështja e plagjaturave padyshim ka qenë një nga më të prekshmet dhe më të rëndat, sidomos kur ky fenomen ka prekur edhe shtyllat e shtetit shqiptar dhe akademikëve.
Megjithatë mesa duket plagjatura e diplomës së doktoraturës së Taulant Ballës, nuk do të shkojë pa u penalizuar.
Ka qenë platforma Exit.al, që ka marrë përsipër të dërgojë një ankesë ndaj kësaj plagjature në Universitetin Alexandru Ioan Cuza dhe nga ajo që bëhet e ditur Komisioni i Etikës pranë këtij universiteti, tashmë e ka marrë nën shqyrtim çështjen.
Nga ajo që mësohet Kodi i Etikës ia ka kaluar shqyrtimin e saj Këshillit Kombëtar për Dhënien e Titujve, Diplomave dhe Certifikatave Universitare (CNATDCU) pranë Ministrisë së Arsimit të Rumanisë.
Sipas rregullores së Ministrisë së Arsimit të Rumanisë, ky institucion është përgjegjës për të trajtuar çështje të “shkeljes së standardeve të etikës profesionale, përfshi kopjimin në një tezë doktorature.”
Sipas Exit.al, në tezën e doktoratuës së tij, shkruar nën supervizimin e Profesor George Poede, Balla ka kopjuar pjesë të tëra nga studimi ‘Politikëbërja në BE: Arritjet, Sfidat dhe Propozimet për Reformë’, kryer nga Andrea Renda për Qendrën për Studime Politike Evropiane në Bruksel. Kopjet nga ky studim Balla i ka futur te punimi i tij i doktoraturës të vitit 2015 ‘Reforma e Sistemit të Vendimmarrjes në Bashkimin Evropian’.
Balla mori vlerësimin më të lartë summa cum laude për punimin e tij shkencor.
Sot jemi para faktit që ankesa është marrë në shqyrtim dhe ndër të tjera universiteti është përgjigjur:
“Këshilli i Etikës vendosi që ankesa me shkrim përmban si të dhënat e identifikimit të personit që e ka paraqitur ankesën, ashtu edhe të dhënat e identifikimit të personave ndaj të cilëve është paraqitur kjo ankesë, si dhe përshkruan se veprimi, sipas paditësit, shkel normat e etikës akademike ose të sjelljes së rregullt në fushën e kërkimin shkencor. Prandaj, nënvizojmë zyrtarisht se ankesa përmban të gjitha elementet e nevojshme për t’iu paraqitur Komitetit të Etikës.”
“Legjislacioni rumun i jep CNATDCU-së 45 ditë për të vendosur mbi këtë rast. Nëse rezulton të ketë kopjuar, Taulant Ballës do t’i hiqet titulli “Doktor i Filozofisë”, përfundon artikulli i Exit.al
