Alar Karis po zhvillon vizitën e tij të parë si presidenti i Estonisë në Shqipëri.
Në intervistën e tij për “Top Story”, bëri shumë përshtypje kur ai tregoi se niveli i digjitalizimit ka arritur në atë pikë në vendin e tij saqë ai i firmos edhe dokumentet nga celulari.
“Tani mjafton vetëm celulari dhe nuk ke më nevojë as për kartën e identitetit. Duhet të paraqitesh vetëm në rastet e divorcit, ndërsa në rastet e tjera, gjithçka është online. Ne jemi mësuar tashmë, madje e kemi të vështirë ta përshkruajmë se si funksionon. Unë mund të nënshkruaj të gjitha dokumentet që këtu, nëpërmjet celularit. Vendos kodin PIN dhe mund të nënshkruaj çdo dokument të nevojshëm, në çdo vend dhe kudo. Në këtë mënyrë ne zhvilluam iniciativa të reja, ide të reja dhe këtë përvojë e ndamë me të gjithë”.
Madje ai këtë praktikë ia propozon edhe qeverisë shqiptare.
“Një prej arsyeve qe jemi këtu, është t’i themi qeverisë suaj që këtu të hapet një akademi elektronike. Këto zhvillime po bëhen edhe në vende të tjera, nuk jemi vetëm ne. Ne e nisëm herët, por ndoshta sa më i madh të jesh, aq më shpejt mund të lëvizësh”.
Në Estoni, qytetarët mund të votojnë nga çdo vend i botës ku ndodhen ditën e zgjedhjeve, në mënyrë online.
“Kemi arritur ta menaxhojmë. Çdo kush, kudo të jetë mund të votojë. Patjetër që mund të shkojnë dhe në kutinë e votimin. Herën e parë që zhvilluam zgjedhjet, mbi 50 për qind votuan on line. Diskutimi për vjedhje ende vazhdon. Kemi pasur një sulm në vitin 2007, por kemi sofistikuar mjetet mbrojtëse. Është proces efikas”.
Gjithashtu ndër të tjera presidenti i Estonisë thotë se është momenti që dy vendet të bashkëpunojnë në fushën e turizmit, sigurisë kibernetike por edhe drejtime të tjera.
“Është hera e parë që vij këtu si president. Herën e parë isha para 6 a 10 vitesh, vura re se gjërat kanë ndryshuar, Tirana ka ndryshuar. Qëllimi i vizitës kësaj herë është i thjeshtë. Së pari jemi vende të vogla dhe vendet e vogla duhet të bashkëpunojnë me njëra tjetrën. Estonia është pjesë e Bashkimit Europian, Shqipëria është në procesin e integrimit europian. Ne erdhëm këtu të japin përvojën tonë nga e kaluara dhe të kemi marrëdhënie dypalëshe sepse jemi të ngjashëm, megjithatë jemi larg. Duhet të njihemi më mirë dhe të fillojmë jo vetëm procesin e turizmit, por edhe biznese të tjera. Ju përmendet sigurinë kibernetike, te cilën do ta ushtrojmë pasi jam i interesuar sesi do të funksionojë këtu. Do ta monitorojmë së bashkë me presidentin tuaj”, shprehet presidenti i Estonisë.
