Një ngjarje e rrezikshme ka ndodhur paraditen e sotme në aksin nacional Elbasan–Tuneli i Krrabës–Tiranë, pranë fshatit Dopaj, ku një automjet ka marrë flakë gjatë lëvizjes.
Sipas të dhënave paraprake, zjarri ka shpërthyer papritur në pjesën e përparme të makinës, duke detyruar drejtuesin të ndalojë menjëherë dhe të braktisë automjetin për të shmangur rrezikun.
Pavarësisht situatës alarmante, fatmirësisht nuk ka të lënduar. Mjeti është përfshirë thuajse tërësisht nga flakët, duke pësuar dëme të mëdha materiale.
Në vendngjarje ndërhynë menjëherë zjarrfikësit dhe forcat e policisë, të cilët arritën të neutralizojnë flakët dhe të sigurojnë zonën për të shmangur pasoja të mëtejshme për përdoruesit e rrugës.
Shkaku i zjarrit nuk është konfirmuar ende, por dyshohet se bëhet fjalë për një defekt në sistemin elektrik të mjetit.
Policia ka nisur hetimet për të sqaruar plotësisht rrethanat e ngjarjes.
