Lëvizja “Diaspora për Shqipërinë e Lirë” ka dorëzuar një kallëzim penal pranë Prokurorisë së Posaçme kundër Korrupsionit dhe Krimit të Organizuar, duke akuzuar zëvendëskryeministren Belinda Balluku dhe Bashkinë e Tiranës për shpërdorim të detyrës në lidhje me projektin për ndërtimin e impiantit të trajtimit të ujërave të zeza në Kashar.
Kallëzimi është bërë nga përfaqësuesit e lëvizjes, Florian Haçkaj dhe Lulëzim Baumann, të cilët argumentojnë se projekti ka dështuar në realizim dhe ka sjellë pasoja financiare dhe mjedisore të rënda.
Sipas Florian Haçkaj, deri më tani janë shpenzuar mbi 70 milionë euro, por impianti nuk është përfunduar as në vitin 2025, pavarësisht se ndërtimi nisi në 2014 me një afat përfundimi në 2018. “Për më tepër, Shqipëria është paditur në Gjykatën e Strasburgut për këtë çështje dhe qytetarët do të detyrohen të paguajnë dyfish, për një shërbim që nuk është vënë kurrë në punë”, theksoi ai.
Në të njëjtën linjë, ekspertë të mjedisit e cilësojnë situatën si katastrofë ekologjike. Sipas tyre, lumi i Ishmit, ku derdhen ujërat e ndotura të Tiranës, është prej më shumë se një dekade lumi më i ndotur në Evropë, me nivele të metaleve të rënda që tejkalojnë deri në 100 herë normat e lejuara.
“Që nga qendra e Tiranës e deri në grykëderdhje, lumi është i kontaminuar. Rreth një milion qytetarë jetojnë përgjatë këtij baseni dhe preken çdo ditë nga ndotja, që përçon përmes tokës, ujit dhe ushqimeve”, deklaroi një ekspert mjedisor gjatë depozitimit të kallëzimit.
Sipas lëvizjes, dështimi i projektit tregon mungesë transparence, papërgjegjshmëri institucionale dhe nevojën për hetim të thelluar. Ata kërkojnë ndëshkim të përgjegjësve dhe vendosjen në punë të menjëhershme të impiantit, si një hap drejt mbrojtjes së shëndetit publik dhe mjedisit.
