Një grua biznesmeni është dhunuar në një magazinë në lgjen Kordhocë të Lazarati, nga nipi i burrit të saj.
Sipas “Dosja.al” viktima e dhunës është Lavdie Buzheri, ndërsa agresori është Alfons Buzheri.
Konflikti ka ndodhur në ambjentet e pronës së të dhunuarës, e cila ka kundërshtuar futjen e nipit të burrit.
Kjo ka acaruar Alfons Buzherin, i cili e ka dhunuar, duke i shkaktuar plagë të rënda në trup dhe gjymtyrë.
Gruaja ndodhet në spital në gjendje të rënduar fizike dhe psikologjike.
Alfons Buzheri është një emër i njohur për drejtësinë shqiptare.
Në 2014-ën, ai ka qenë pjesë e grupit të zjarrit, që u dënua për vrasjen e efektivit të RENEA-s, Ibrahim Basha.
Më 8 korrik të 2015-ës, ai u arrestua për “Prodhim e shitje narkotikësh” si dhe “Armëmbajtje pa leje”.
Më pas Krimet e Rënda caktuan masën e sigurisë “Arrest me burg” në mungesë për vrasjen e punonjësit të policisë, të kryer në bashkëpunim.
Buzheri rezulton i dënuar me 21 vite burg nga Krimet e Rënda, ndërsa ishte shpallur në kërkim edhe për një sërë veprash të tjera penale.
Më 25 qershor të 2014-ës, Buzheri ka qenë pjesë e bandës së rrëmbimit të tre korrierëve të drogës, ngjarje për të cilën ai është dënuar me 21 vite burg.
Ai lidhi njërin nga pengjet dhe i kërkonte që të nxirrte drogën.
Në 2016-ën ai u arrestua sërish nga policia në Tiranë, pasi tentoi të largohej bashkë me Bako Buzherin.
Ky i fundit gëlltiti drogën për të fshehur provat.
