Policia e Tiranës ka arrestuar tre persona dhe ka proceduar disa të tjerë në lidhje me incidentet e dhunshme që ndodhën para ndeshjes derbi mes Partizanit dhe Tiranës.
Sipas njoftimit të policisë, ata u arrestuan për akuzat e “Kundërshtimit të punonjësit të shtetit,” “Kundërshtim të punonjësit të policisë” dhe “Veprime të dhunshme në aktivitete sportive.” Të arrestuarit janë Egri Ismaili, Erald Vata dhe Lauren Ismaili.
Për veprat e tjera penale, si “Prishja e qetësisë publike” dhe “Veprime të dhunshme në aktivitete sportive,” janë proceduar në gjendje të lirë shtetasit M. S., 31 vjeç, A. Q., 23 vjeç, I. Xh., 37 vjeç, R. B., 30 vjeç dhe A. R., 17 vjeç.
Po ashtu, janë proceduar në gjendje të lirë sekretari i përgjithshëm i K.F. Partizani, G. B, dhe delegati i ndeshjes nga FSHF, M. S., për “Mosbindje ndaj urdhërit të policisë” dhe “Shpërdorim të detyrës.”
Drejtoria Vendore e Policisë Tiranë kishte njoftuar organizatorët më 4 shkurt 2025 se stadiumi “Arena e Demave” nuk i plotësonte kushtet e sigurisë për zhvillimin e ndeshjes, duke krijuar rrezik për incidente.
Megjithatë, pas mungesës së përgjigjes nga organizatorët, Policia e Tiranës mori masa për të parandaluar përshkallëzimin e situatës, duke angazhuar 276 punonjës policie dhe 8 grupe të Forcës Kombëtare të Sigurisë.
