Socialistët duket se po u bëjnë nderin e fundit oligarkëve të qeverisë, duke ju dhënë mundësinë të “kafshojnë” çdo park dhe zonë të mbrojtur në vend.
Qeveria dhe bashkitë e drejtuara nga PS duket se nuk kanë të ngopur. Tirana është mbuluar nga kullat, ndërkohë që Jugun e kanë grabitur investitorët strategjikë. Por PS nuk mjaftohet me kaq. Socialistët duan që të gllabërojnë edhe parqet, por edhe zonat e mbrojtura.
Në Kuvend ka shkuar një ligj ogurzi, i cili synon që të lejojë ndërtimet në zonat e mbrojtura në të gjithë territorin. Me pak fjalë, kërkon që të lejohen hotele, resorte, restorante dhe gjithçka tjetër në Parqet Kombëtare dhe gjithë zonat e tjera të mbrojtura.
Ligji është propozuar nga 12 deputetë, të cilët kërkojnë të zhbëjnë disa nene në ligjin aktual, i cili ndalon kategorikisht ndërtimet dhe aktivitetet në zonat e mbrojtura. Një nga nenet më skandalozë është neni 13: “Në nenin 20, bëhen shtesat si më poshtë: 1. Gërma “c” e pikës 3 ndryshon si më poshtë: “c) Përdorimin e tokës dhe kryerjen e aktiviteteve që zbatojnë parimet e zhvillimit të qendrueshëm me fokus zhvillimin ekonomik të zonës. 2. Pas shkronjës “dh” të pikës 3 shtohet shkronja ‘e’ me përmbajtje: e) lejimin në përputhje me parimin e efektivitetit dhe planit të menaxhimit të ndërhyrjeve të lejuara urbane, apo industriale brenda zonës duke ruajtur karakterin e zonës sipas parashikimeve të këtij ligji”.
Skandaloz është edhe neni 9 ku thuhet: “Territoret që shpallen zona të mbrojtura mjedisore, përveçse kur parashikohet ndryshe në këtë ligj, kanë për qëllim të përmbushin objektivat e përgjithshëm si më poshtë: të vlerësojë në përputhje me parimin e efektivitetit mundësinë për ndërhyrje brenda zonës, por pa u kufizuar në, zona urbane, rekreacioni, infrastrukturë rrugore, hekurudha, infrastrukturë energjetike, përfshirë impiantet për prodhimin e energjisë së ripërtëritshme, infrastrukturës së naftës dhe gazit”.
Propozuesit e ligjit justifikohen se këto ndryshime vijnë në momente të një pjekurie intelektuale të shoqërisë dhe të vendosjes së rregullave të qarta dhe të përshtatshme për të siguruar që vendi ofron një paketë turistike të larmishme, por edhe të qendrueshme dhe që komuniteteve lokale u ofrohet një mundësi e shkëlqyer zhvillimi. Madje sipas tyre, duke ‘kafshuar’ parqet e zonat e mbrojtura, krijohen vende pune dhe zhvillohen zonat përkatëse.
Nëse shohim me kujdes, qeveria ndërhyri në Butrint dhe atë ua dha oligarkëve. Po ashtu, edhe në Jug po tentohet të ndërhyhet në zonat e mbrojtura, në mënyrë që investitorët strategjikë të Bablokut të ndërtojnë hotele dhe resorte. Pikërisht ky ligj heq çdo pengesë dhe lejon që të gllabërohet çdo centimetër tokë. /Pamfleti
