Kuvendi i Kosovës dështoi edhe në tentativën e 23-të për t’u konstituuar. Edhe këtë të enjte nuk u arrit numri i nevojshëm i votave për formimin e Komisionit për votim të fshehtë, i cili do të shërbente për zgjedhjen e kryeparlamentarit.
Nga 111 deputetë të pranishëm në seancë, vetëm 55 votuan pro, një kundër dhe nuk pati asnjë abstenim.
Kryesuesi i seancës, Avni Dehari, i bëri thirrje partive PDK, LDK, AAK, Nisma dhe Lista Serbe që të propozonin kandidatët e tyre për komision, por ato refuzuan dhe nuk morën pjesë në votim.
Për shkak të mungesës së kuorumit, seanca u ndërpre dhe do të vazhdojë më 31 maj në orën 10:30.
Ky dështim ka zhytur Kosovën në një krizë politike, duke e lënë vendin pa qeveri të re, edhe pse kanë kaluar më shumë se tre muaj nga zgjedhjet.
Kjo situatë mbetet shqetësuese, sidomos në kushtet kur ka thirrje të përsëritura nga aktorë të brendshëm dhe ndërkombëtarë për avancimin e procesit të krijimit të institucioneve.
Partia Demokratike e Kosovës vazhdon të kërkojë ndryshimin e kandidatit për kryetar të Kuvendit, për të zhbllokuar procesin, por mungesa e votave të mjaftueshme e ka bllokuar zgjedhjen e kryetarit.
Lëvizja Vetëvendosje, e cila doli fituese në zgjedhje dhe është në koalicion me Guxo dhe Alternativën, nuk ka arritur të sigurojë shumicën prej 61 votash për të zgjedhur Albulena Haxhiun në krye të Parlamentit.
Për konstituimin përfundimtar të Kuvendit, deputetët duhet të zgjedhin kryetarin dhe pesë nënkryetarët. Vetëm pas përfundimit të këtij procesi, mund të formohet Qeveria e re.
