Sot vazhdon gjyqi në Peshkopi për çështjen e blerjes së votave e quajtur “dosja 184”. “Shtyrja e gjyqit bëhet për të kaluar afatet e çështjes, që të mbyllet fare dosja. Është hera e dytë që shtyhet. Na kanë thirrur dhe nuk na kanë pyetur dhe as nuk na kanë lënë për të folur.
Djalit tim i kanë hequr asistencën se pse jemi demokratë. Janë thirrur vetëm demokratët. Këta janë specialistë, jo socialistë.”, tha Haki Çenka një prej dëshmitarëve të dosjes 184.
Në këtë proces gjyqësor në Dibër po mbahet seancë për katër pandehur, të cilët akuzohen për shit-blerje të votave. Në mesin e të pandehurve ka edhe ish-zyrtarë të lartë në Dibër, të dyshuar të përfshirë në vjedhjen e votave për zgjedhjet lokale të vitit 2016. Dosja e bujshme 184, që trazoi politikën shqiptare pas publikimit të përgjimeve në BILD-in Gjerman, u zhbë, përderisa bëri disa herë rrugëtimin nga Dibra në Tiranë e anasjelltas, për t’u vendosur përfundimisht në qytetin e largët, pasi SPAK lau duart prej saj, me pretendimin se nuk kishte kompetencë për ta hetuar.
4 të pandehurit
Listën e të pandehurve e kryeson Robert Aga, ish shef komisiariati i cili akuzohet për shpërdorim detyre, pasi me dashje dhe në kundërshtim me ligjin ka vënë uniformat blu në funksion të një subjekti politik, në rastin konkret maxhoranxës socialiste.
Drini Gjeci, ish-drejtor i Arsimit, do të përgjigjet para drejtësisë për shpërdorim detyre, pasi kanoste mësuesit se nëse nuk votonin në favor të kandidatit të mbështetur nga maxhorancxa, do t’i largonte nga detyra. Madje në një rast, sipas asaj që thuhet në dosje ai ka firmosur për shkarkimin e një mësuesi nga puna.
Nuri Meda, administrator i Njësisë Administrative Tomin akuzohet për shpërdorim detyre dhe kanosje të zgjedhësve. Në kundërshtim me ligjin ai ka dëmtuar interesat e qytetarëve, pasi ka përjashtuar 39 familje nga skema e ndihmës ekonomike, vetëm për shkak të bindjeve politike, pa verifikuar nëse i plotësonin ose jo kriteret për të qenë pjesë e skemës.
Edhe Hasan Hoti nga njësia administrative Lurë akuzohet se ka kanosur zgjedhësit me qëllim që të votonin për kandidatin për kryebashkiak i Aleancës për Shqipërinë Europiane. /Gazetareforma.com/
