Ish-kandidati për kreun e Partisë Demokratike, Fatbardh Kadilli ka reaguar pas deklaratave të amabasadores Yuri Kim, për ish-kryeministrin Sali Berisha.
Në një status në Facebook, Kadilli shkruan se është e turpshme që kryetari i PD të vihet me shpatulla pas muri nga ambasadorja amerikane për një çështje që bën sikur nuk është. Kadilli thotë se është e papranueshme që Basha pas takimit me Kim, të kryejë veprime vetëm për të ruajtur karrierën apo karrigen.
Reagimi i plotë:
Deklarim
Është e turpshme që kryetari i Partisë Demkratike vihet me shpatulla pas muri nga Ambasadorja e USA për një çështje që zvarritet prej kohe, për një çështje që bën sikur nuk është.
Është e pafalshme që vendimet e nesërme të jenë në kundërshtim me standardin dhe kërkesat e SHBA, vendit që ka një peshë të madhe në krijimin dhe mbështetjen e Partisë Demokratike.
Është e papranueshme që Kryetari, pas këtij takimi, të kryejë veprime dhe të marrë vendime të detyruara vetëm e vetëm për të ruajtur karrierën apo karriken, por aspak pse ai beson me sinqeritet tek aleanca strategjike me SHBA.
Mbërritja në këtë situatë nuk e rrit besimin tek lidershipi i tij por e zvogëlon atë edhe më shumë në raport me Shqipërinë, SHBA dhe demokracinë.
Në Kuvendin Kombëtar u bëra thirrje demokratëve “për tu ndarë nga çdo trashëgimi që na kompromenton, që na mban peng. Sado emocione të na lidhin me atë”.
Demokratë të shohim nga e ardhmja.
Ditën e sotme, ambasadorja amerikane Yuri Kim deklaroi pas një takimi me Bashën, se ish-kryeministri Sali Berisha nuk duhet të jetë në parlament në shtator, pas shpalles së tij “non-grata” nga SHBA.
