Kalaja e Lezhës ka ardhur e ka degraduar në një gjendje të mjerueshme. Që kur shkon, duhet të kesh kujdes. Ura hyrëse prej druri është kalbur, dhe sia nga dërrasat janë të rëna.
Asgjë nuk mbaron këtu. Në këtë aset turistik, mungon edhe sistemi i ndriçimit. Llambat e vendosura në vitin 2012 për 100-vjetorin e pavarësisë funksionuan vetëm pak kohë dhe investimi degradoi. Prozhektorët e kabllot u vodhën nga persona ende të paidentifikuar. Banoret të zonës e vizitor e konsiderojnë të pafalshme lënien në harrese të kalasë së Lezhës.
Në këtë situatë kalaja ka nisur të braktiset nga vizitoret. I kontaktuar në lidhje me problemin e urës, specialisti Kulturës në Lezhë, Ded Margjoni thotë se Instituti Kombëtar i Trashëgimisë Kulturore ka miratuar fondin me vlerë 4 milionë lekë për rindërtimin e urës, por paratë ende nuk janë lëvruar.
Sakaq, “Report Tv” kontaktoi me drejtoreshën e përgjithshme të Institutit Kombëtar të Trashëgimisë Kulturore, Arta Dollani, e cila tha se kalaja do restaurohet me fondet e BE, ndërsa ndriçimi do të bëhet së shpejti me fondet e ministrisë.
“Kalaja e Lezhës është përfshirë në programin e rindërtimit. Është një nga projektet që do hartohet dhe do financohet me Delegacionin Europian, sepse është në zonën e tërmetit. Ndërkohë sa i përket ndriçimit janë 15 kala që janë përfshirë në një projekt që po bën Ministria e Kulturës për ndriçimin e tyre, ku bën pjesë edhe Lezha. Ndriçimi do përfundojë deri në fund të vitit, ndërsa sa i përket rindërtimit, projekti do të jetë gati në dhjetor dhe më pas do të vijojë puna”, tha Arta Dollani.
/Burimi: Report Tv/GazetaReforma.com/
