Ish-tekniku i Kombëtare Shqiptare të Futbollit, Gianni De Biasi, mbetet një nga trajnerët më të dashur për shqiptarët, pasi udhëhoqi për herë të parë ekipin përfaqësues, në një turne madhor.
Në këto ditë të vështira, De Biasi nuk e ka harruar Shqipërinë dhe ka nisur një fushatë për mbledhjen e fondeve, për të prekurit nga tërmeti.
Shqipëria është shtëpia e tij e dytë, duke qenë se ka edhe pasaportë shqiptare.
Në një postim në profilin e tij në Facebook, De Biasi bën me dije, se më 14 dhjetor do të organizohet një aktivitet çiklistik, të ardhurat e të cilit do të shkojnë për të prekurit nga tërmeti.
Ish-trajneri i Kombëtares ka bërë apel, që pjesëmarrësit të jenë sa më të shumtë në numër.
“Në 14 dhjetor miqtë e mijë organizojnë një aktivitet çiklistik për mbledhje fondesh, që do i vijnë në ndihmë të prekurve nga tërmeti në Shqipëri. Ju ftoj të marrim pjesë të gjithë, të shumtë në numër. Edhe ne mund të japim ndihmën tonë. Forca Shqipëri”, shkruan De Biasi.
