Departamenti Amerikan i Shtetit ka deklaruar se kundërshton çdo veprim të udhëheqësve lokalë në Bosnjë e Hercegovinë që mund të cënojë sigurinë dhe stabilitetin e vendit.
Kjo deklaratë u bë nga zëdhënësja e DASH-it, Tammy Bruce, në reagim ndaj dënimit të presidentit të Republikës Sërpska, Millorad Dodik, nga Gjykata e Bosnjës me një vit burg dhe ndalim të ushtrimit të detyrës për gjashtë vjet.
Në një postim në X, Bruce theksoi se Shtetet e Bashkuara kanë mbështetur për dekada një Bosnjë e Hercegovinë të qëndrueshme dhe se qëndrojnë fuqishëm në mbrojtje të Marrëveshjes së Dejtonit, si dhe të sovranitetit dhe integritetit territorial të vendit.
“Shtetet e Bashkuara kanë investuar për dekada për një Bosnje e Hercegovinë stabile. Ne kundërshtojmë fuqishëm çdo veprim nga udhëheqësit lokalë që do të minonte sigurinë dhe stabilitetin. Ne mbështesim Marrëveshjen e Dejtonit dhe sovranitetin dhe integritetin territorial të Bosnjë e Hercegovinës”, shkroi në X, zëdhënësja e DASH-it, Tammy Bruce.
Dodik, i cili më parë është përfshirë dy herë në listën e zezë të SHBA-ve për veprimet e tij kundër Marrëveshjes së Dejtonit, u dënua më 26 shkurt për shpërfilljen e vendimeve të Përfaqësuesit të Lartë të bashkësisë ndërkombëtare, Christian Schmidt.
Megjithatë, i akuzuari tjetër në këtë çështje, Millosh Llukiq, u shpall i pafajshëm.
Dënimi ndaj Dodikut lidhet me nënshkrimin e dy ligjeve të Republikës Sërpska, të shpallura jokushtetuese dhe të shfuqizuara nga Përfaqësuesi i Lartë.
Ligjet në fjalë synonin të mos zbatonin vendimet e Gjykatës Kushtetuese të Bosnjës dhe të Përfaqësuesit të Lartë brenda territorit të Republikës Sërpska. Sipas Kodit Penal të Bosnjës, një shkelje e tillë mund të ndëshkohet me burgim nga gjashtë muaj deri në pesë vjet dhe mund të çojë në shkarkimin nga detyra të të dënuarit, si dhe ndalimin e aktiviteteve të tij politike.
Pas vendimit, Dodik u shfaq para mbështetësve të tij jashtë Asamblesë Kombëtare të Republikës Sërpska, duke u siguruar atyre se “nuk ka arsye për shqetësim”.
Ai gjithashtu paralajmëroi veprime nga Asambleja e entitetit serb, përfshirë refuzimin e procesit në Gjykatën e Bosnjës dhe ndalimin e punës së Prokurorisë në territorin e Republikës Sërpska. Po ashtu, ai tha se do të propozohej një ligj për të ndaluar zbatimin e vendimeve të Gjykatës së Bosnjës dhe për të bllokuar funksionimin e Këshillit të Lartë Gjyqësor dhe Prokurorial të Bosnjës në këtë entitet.
Vendimi ka shkaktuar reagime të ashpra në Serbi. Presidenti serb, Aleksandar Vuçiq, e cilësoi atë si “të turpshëm, të paligjshëm dhe jodemokratik”, duke akuzuar autoritetet boshnjake se synojnë “shkatërrimin e Republikës Sërpska dhe dobësimin e serbëve në rajon”.
Ndërkohë, ministri i Brendshëm serb, Ivica Daçiq, pas një mbledhjeje të Këshillit të Sigurisë Kombëtare të Serbisë, bëri të ditur se ky organ ka miratuar shtatë konkluzione, mes të cilave dënohet vendimi i gjykatës, bëhet thirrje për respektimin e Marrëveshjes së Dejtonit dhe kërkohet ndalimi i “shkatërrimit të mëtejshëm të sistemit të krijuar nga ky dokument”.
Në të njëjtën linjë me Vuçiqin dhe Daçiqin, zëvendëskryeministri serb, Aleksandar Vulin, e cilësoi vendimin si “një sulm ndaj serbëve dhe Serbisë”
