Situata në fshatin Hasturkas të njësisë administrative Libofshë vijon të mbetet problematike edhe 24 orë pas daljes së lumit Seman nga shtrati, duke shkaktuar përmbytje të konsiderueshme dhe dëme të rënda për banorët e zonës.
Edhe pse niveli i ujit ka shënuar një rënie të lehtë, rreth 20 centimetra sipas banorëve, në banesat e përmbytura uji vazhdon të jetë mbi një metër, duke i bërë ato tërësisht të pabanueshme. Si pasojë, rreth 20 familje janë detyruar të braktisin shtëpitë dhe të strehohen në zona më të sigurta.
Dëmet janë të konsiderueshme edhe në ekonomi. Janë përmbytur stane, sipërfaqe të mëdha tokash bujqësore dhe kultura të mbjella, kryesisht vreshta, ullinj dhe foragjere. Po ashtu janë dëmtuar edhe koshere bletësh, duke rënduar ndjeshëm gjendjen financiare të familjeve që jetojnë nga bujqësia dhe blegtoria.
Banorët kërkojnë ndërhyrje të menjëhershme nga institucionet shtetërore, duke apeluar për dërgimin e ekipeve të verifikimit në terren për evidentimin e dëmeve dhe hapjen e procedurave të dëmshpërblimit.
Alarmi mbetet i lartë edhe për shkak të çarjes së argjinaturës së lumit Seman në disa segmente. Sipas banorëve, kjo situatë paraqet rrezik serioz, pasi priten reshje të reja shiu dhe ekziston frika e një vërshimi të dytë të ujit. Ata kërkojnë ndërhyrje urgjente nga Bordi i Kullimit për mbylljen e çarjeve dhe parandalimin e përkeqësimit të mëtejshëm.
Sipas të dhënave nga terreni, situata po shkon gradualisht drejt normalizimit. Raportohet për disa shpendë të ngordhur, por nuk ka pasur bagëti të mbytura, falë ndërhyrjes së forcave të ushtrisë, të cilat kanë ndihmuar në largimin e bagëtive nga zonat e rrezikuara.
Disa banorë mbetën të izoluar përkohësisht si pasojë e përmbytjes, por janë evakuuar dhe sistemuar në zona të sigurta. Situata në Hasturkas vijon të jetë nën monitorim të vazhdueshëm, ndërsa banorët presin masa konkrete dhe ndërhyrje të shpejtë për riparimin e argjinaturës dhe vlerësimin e plotë të dëmeve të shkaktuara.
