Policia e Shtetit ka bërë publike detaje nga operacioni ku u arrestuan në flagrancë shtetasit Ervis Bakalli, 30 vjeç, banues në Tiranë, dhe Dorian Kalo, 45 vjeç, banues po në Tiranë. Ato akuzohen për veprën penale ’’Mbajtja pa leje dhe prodhimi i armëve, armëve shpërthyese dhe municioneve”, kryer në bashkëpunim. Sipas autoriteteve, hetuesit kanë mbajtur nën vëzhgim, Dorian Kalon pasi dyshonin se merrej me aktivitet kriminal. Pas ndjekjes së tij për një periudhë kohore, policia ka rënë në gjurmët e punishtes ku modifikoheshin armët, më konkretisht në banesën e Elvis Bakallit 30-vjeç, në Kodër-Mëzez të Tiranës. Sipas edhe pamjeve filmike në momentin e ndërhyrjes nga shërbimet e Policisë, në këtë ambient janë gjetur duke punuar shtetasit Ervis Bakalli dhe Dorian Kalo, të cilët u arrestuan në flagrancë. Të gjitha aksesorët për modifikimin e armëve dhe silenciatorëve ne depon e zbuluar në Kodër-Mëzez, vinin në rrugë ilegale, nga jashtë vendit.
Kujtojmë se emri i Dorian Kalos ka dalë nga dëshmia e një bashkëpunëtori të drejtësisë Enver Jamakut, që e ka përmendur pikërisht si një nga personat që ka bazë për modifikimin e armëve të llojeve të ndryshme, duke i riparuar dhe duke i ndërruar pjesët. Dëshmia e tij specifikonte se armët e prodhuara dhe modifikuara, Dorian Kalo dhe anëtarë të tjerë të grupeve kriminale që Jamaku përmend, i shisnin armët me porosi tek grupe të tjera kriminale, që më pas i përdornin në krime kundër jetës.
Pamjet e publikuara nga Policia e Shtetit
