Një skandal i madh është zbuluar pas një auditi të Kontrollit të Lartë të Shtetit (KLSH) në Drejtorinë Rajonale të Autoritetit Kombëtar të Ushqimit (AKU) në Qarkun e Tiranës. KLSH ka konstatuar shkelje të rënda nga inspektorët e AKU gjatë kontrolleve në dyqane mishi dhe tregje. Inspektorët kanë konfiskuar mish që tregtohej jashtë kushteve të higjienës, i pavulosur dhe i pacertifikuar, një veprim që konsiderohet i drejtë dhe i nevojshëm.
Megjithatë, skandali që pason është tronditës: inspektorët e AKU-së kanë dërguar mallin e sekuestruar në dy fabrika përpunimi mishi, konkretisht në fabrikën Kazazi dhe Balcon Zoo Farm. Sipas KLSH, ky mish duhej të ishte destinuar për groposje dhe në asnjë mënyrë nuk mund të dërgohej në kompani private, të cilat janë gjithashtu subjekt inspektimi nga AKU.
“Ç’PO HAMË!!!!”
Skandali thellohet edhe më tej pasi nuk është administruar asnjë fletë-hyrje në fabrikë për mishin e bllokuar dhe nuk ekziston asnjë dokument që të faktojë se është bërë asgjësimi i mishit të destinuar për groposje. KLSH ka ngritur alarmin, duke shprehur shqetësimin se pas dorëzimit të mishit te subjekti Kazazi, ekziston mundësia që ky mish të përpunohet dhe të rifutet përsëri në treg.
“Pas dorëzimit të mishit te subjekti Kazazi, ekziston mundësia që ky mish të përpunohet dhe të rifutet përsëri në treg,” thuhet në deklaratën e KLSH. Nuk dihet se ku ka përfunduar kjo sasi mishi e bllokuar, pasi nuk disponohet asnjë foto për asgjësimin e tij.
